بەردەڤکێ پارتیا داد و گەشەپێدانێ (ئاک پارتی) عۆمەر چەلیک راگھاند، سەرۆکۆمار رەجەب تەییب ئەردۆگان دێ ھەفتەیا بێ پێشوازیا شاندا دەم پارتیێ بکە. چەلیک ھەروھا دا زانین، پرۆسەیا چەکدانینا پەکەکێ ئێدی کەتیە قۆناغا داوی و ئەو ل بەندێ نە کو ئەڤ یەک “د ناڤا رۆژان دە” پێک وەرە.
عۆمەر چەلیک، ئیرۆ سێشەمبێ 1ی تیرمەھا 2025ێ، پشتی جڤینا شێور و نرخاندنێ یا لگەل پارلامەنتەرێن پارتیا خوە کو د بن سەرۆکاتیا سەرۆککۆمار ئەردۆگان دە ل ناڤەندا گشتی یا پارتیێ پێک ھات، ژ بۆی رۆژنامەڤانان ئاخڤی.
“ھەڤدیتنا لگەل دەم پارتیێ ھەفتەیا بهێت دێ هێت ئەنجامدایین”
ل سەر پرسا دەربارێ پێشھاتێن داوی یێن پرۆسەیا “ترکیەیا بێتەرۆر”، چەلیک پشتراست کر کو ھەڤدیتنا د ناڤبەرا ئەردۆگان و شاندا دەم پارتیێ دە دێ ھەفتەیا بهێت دە دێ هێت ئەنجامدایین و گۆت:
“برێز سەرۆکۆمارێ مە دێ ھەفتەیا بهێت شاندا دەم پارتیێ قەبوول بکە. ھەلبەت کیژان رۆژ بە دێ د بن بریارا برێز سەرۆککۆمار دە بە. گاڤا کو بەرنامەیا وی ئەشکەرە ببە، ئیحتیمالە سەرێ ھەفتەیێ بە، دێ هێت راگھاندن و ھوون دێ ھەموو پێ بحەسن. ئەڤ ھەڤدیتن دێ ھەفتەیا بهێت هێتە ئەنجامدایین.”
“دەما چەکدانینێ، ژ مەھان داکەت رۆژان”
دەربارێ پێڤاژۆیا چەکدانینا پەکەکێ دە، چەلیک دا زانین، ئەو ناخوازە رۆژەکا دیارکری دەستنیشان بکە، لێ تەکەز کر کو پرۆسە ب لەز پێش دکەڤە. وی پێشکەتنا پرۆسەیێ وھا ئانی زمان:
“دەما وە ھەفتەیێن بەرێ پرسی، من گۆت ئەم ل بەندێ نە د ناڤا مەھان بهێتە ئەنجامدان. پاشێ د جڤینا خوە یا داوی دە من گۆت د ناڤا ھەفتەیان دە. نھا ئەم گھشتینە قۆناغەکێ کو ئەم دکارین ببێژین دێ د ناڤا رۆژان دە هێت ئەنجامدایین. ژ بەر ڤێ یەکێ، ژ بۆ ترکیەیەکا بێ تەرۆر رۆژێن پێش مە دێ گەلەکی گرینگ بن.”
