بەردەڤکا حکوومەتا ئیرانێ فاتیما مۆھاژەرانی ئەشکەرە کر، زرارەکا مەزن گھیشتیە ناڤەندێن ئەتۆمی یێن وەلاتێ وێ. دەربارێ ژ نوو ڤە دەستپێکرنا گۆتووبێژێن لگەل ئامەریکایێ ژی، مۆھاژەران گۆت، “ھەتا نھا ت دەمەک ژ بۆ دەستپێکرنا گۆتووبێژان نەھاتیە دیارکرن و ئەگەرە د دەمەک نێزیک دە ژی نەیێ کرن.”
مۆھاژەرانی ئیرۆ 1ێ تیرمەھێ د کۆنفەرانسا خوە یا رۆژنامەڤانی یا ھەفتانە دە، گۆتنێن سەرۆکێ ئامەریکایێ دۆنالد ترامپ یێن دەربارێ زرارا ل ناڤەندێن ئەتۆمی یێن ئیرانێ دە پشتراست کر و گۆت: “بێگومان زرارەکا مەزن گھیشتیە بنەسازیا ناڤەندێن مەیێن ئەتۆمی، لێ ئەو ب تەمامی وێران نەبوونە.”
ل سەر گۆتنێن ترامپ کو ئیرانێ داخوازا گۆتووبێژان کریە، بەردەڤکا حکوومەتا ئیرانێ گۆت: “ئەم دەریێ گۆتووبێژان ناگرن و دەست ژێ بەرنادن، لێ چ دەمەک ژ بۆ ژ نوو ڤە دەستپێکرنێ نەھاتیە دیارکرن و چ ھێڤی ژی نینە کو ئەڤ دەمە نێزیک بە.”
مۆھاژەرانی ھەروھا بەحسا ئامارێن “شەرێ 12 رۆژان” ژی کر و راگھاند، د وی شەری دە 935 کەس ھاتنە کوشتن و 5646 کەس ژی بریندار بوونە. ھەروھا دا زانین ژی، 3500 خانیان زرار دیتنە و 332 ژ ڤان خانیان ل سینۆرێ تەھرانێ نە.
