پەکەکێ د 5ێ گولانێ دە ب کۆنگرەیا خوەیا کو پێک ئانی راگھاند کو دێ چەکان دانە. لێ ژ وێ رۆژێ ھەتا نھا مەدیایا پەکەکێ بەرێ لوولییا خوە دایە کورد و کوردستانێ.
ھەرێما کوردستانێ و ب تایبەتی سەرۆک بارزانی ژ بۆ ھێسانکرنا دانینا چەکان یا پەکەکێ و دابینکرنا ئەولەھیا پێڤاژۆیا کو تێ ژییاندن د ناڤا پشتگرییەکا پرئالی دەیە. لێ پەکەکە ب مەدیایا خوە ل دژی حکوومەتا ھەرێما کوردستانێ، پەدەکێ و تەڤگەرا سیاسی یا بارزانی ژ دژمناتیێ گاڤ پاشڤە نەهاڤێت و ھەر رۆژ ب ئاوایەکی زراڤتر ئێریش و رەشکرنێن خوە ددۆمینە.
ھەری داوی دوھی سەردانا ئیبراھم کالن کو مستەشارێ میتا دەولەتا ترکیێیە بۆ ھەولێرێ ژی د مەدیایا پەکەکێ دە ب چەوتی ھات بەلاڤکرن. مالپەرا ترکی یا رۆژ نیوزێ نووچە ب زمانەکی نۆرمال بەلاڤکر، مالپەرا سۆرانی ژی مانشێتەک وەھا بکار ئانی “سەرۆکێ میتێ ب ئاوایەکی نهێنی ل ھەولێرێیە” و د ناڤەرۆکا نڤیسێ دە ژی مانشێتەک ب ڤی ئاوایی دانی “مستەشارێ میتێ ژ بۆ دیتنا ترکمەن و رێڤەبەریا ھەرێما کوردستانێ ھات”.
رۆژێن بۆری گرووپەکی ترکمەنا و حەشدا شەعبی ژ بۆ دژاتیا دانانا سەرۆکێ باژێرڤانیێ کو کورد بوو ل پردێ خوەپێشاندان کرن و ئێریشی سەر ئاڤاھیێن فەرمی کرن. ژ بەر ڤێ یەکێ تێ خویا کرن کو د دەمەکێ دە کو د ناڤبەرا ترکمەن و کوردان دە ل کەرکووکێ و دەڤەرێن دن رەوشەکا ھەستیار ھەیە، ئەڤ مژارە کرە ب مەبەستێ کوورکرنا کێشەیێ یە وەک نووچە هاتیە بەلاڤکرن.
مەدیایا پەکەکێ ل ئالییەکی ژ بۆ رەشکرنا رێڤەبەریا باشوورێ کوردستانێ نووچەیان بەلاڤ دکە، ل ئالییێ دن ژی ھەموو لایەنێن دەرڤەیی پەکەکێ وەکە دژمن دەستنیشان دکە و گەفا ل وان دکە.
