پارتیا وەلاتپارێزێن کوردستانێ (PWK) ب بۆنەیا سالڤەگەرا 32یێ یا کۆمکوژیا سێواسێ، داخویانیەک بەلاڤ کر و کەسێن کو د 2یێ تیرمەھا 1993یێ دە ل ئۆتێلا مادماکێ ھاتبوون کوشتن، ب رێزداری ببیر ئانی.
د داخویانیا کو ژ ئالیێ نڤێسینگەها راگھاندنێ یا PWK ڤە ھاتیە وەشاندن دە، ھات دەستنیشانکرن کو تەڤی کو 32 سال د سەر کۆمکوژیێ را دەرباس بوونە ژی، کوژەر و کەسێن ل پشت وان نەھاتنە ئەشکەرەکرن و سزادان.
“ل بەر چاڤێن دەولەتێ ئێریش کرن”
PWK د داخویانیا خوە دە ئاماژە ب بوویەرا ھۆڤانە یا 2یێ تیرمەھا 1993یێ کر و دا زانین، د چارچۆڤەیا شاھیێن پیر سولتان عەبدال دە، کۆمەکا مەزن ب ئاوایەکی ھۆڤانە ئێریشی ئۆتێلا مادماکێ کرنە کو رەوشەنبیر و ھونەرمەندێن بەشداری شاھیێ لێ دمان.
د داخویانیێ دە ھات گۆتن: “ئێریشکەران ب سلۆگانێن وەکە ‘سێواس ژ یێن لایق رە دێ ببە گۆرستان”، ل بەر چاڤێن پۆلیس و ھێزێن ئەولەکارییێ یێن دەولەتێ ئێریش بربوون سەر ئۆتێلێ و ئۆتێل شەوتاندن. د ئەنجامێ دە 33 رەوشەنبیر و ھونەرمەند و 2 خەباتکارێن ئۆتێلێ ب شەواتێ و دووخانێ ژیانا خوە ژدەست دان.”
“بنپێکرنا مافێ ژیان و رامانێ بوو”
PWK ئەڤ ئێریش وەکە “بنپێکرنا مافێ ژیانێ و ئێریشەک ل دژی مافێ رامانی و باوەریێن جودا” پێناسە کر. ھەروھا بال کشاند سەر وێ یەکێ کو دۆزێن دەربارێ کۆمکوژیێ دە ھاتن ڤەکرن بێەنجام مانە و ھەتا رۆژا ئیرۆ ژی بەرپرسیار نەھاتنە دادگەهکرن.
د داویا داخویانیێ دە، PWK ئێریشکەر و کەسێن ل پشت وان و پارێزڤانێن وان ب توندی شەرمەزار کرن و د سالڤەگەرا 32یێ یا بوویەرێ دە قوربانیێن کۆمکوژیێ ب رێزداری ببیر ئانین.
