دەم پارتیێ راگھاند، پەکەکە دێ ل ھەرێما کوردستانێ مەراسیمەکا چەکدانینێ لدار بخە و ئەڤ یەک وەکە “قۆناغەکا نوو یا پرۆسەیا ئاشتیێ” بناڤ کر. دەم پارتی بانگ ل رۆژنامەڤانان کر کو ژ بۆ بەشداریێ ناڤێن خوە تۆمار بکن.
پارتیا وەکھەڤی و دەمۆکراسیێ یا گەلان (دەم پارتی) ئیرۆ 5ێ تیرمەھێ راگھاند، پەکەکە دێ ل ھەرێما کوردستانێ مەراسیمەکا چەکدانینێ ل دار بخە. دەم پارتیێ ئەڤ پێنگاڤ وەکە قۆناغەکا نوو د پێڤاژۆیا ئاشتیێ دە نرخاند و ژ بۆ ھێسانکرنا بەشداریا چاڤدێران، دەست ب تۆمارکرنا ناڤێن رۆژنامەڤان و نوونەرێن سازیێن جڤاکا سڤیل کریە.
د داخویانیەکا نڤیسکی دە، دەم پارتیێ ئەشکەرە کر کو ب بریارا چەکدانینێ، پێڤاژۆیا چارەسەریێ گھشتیە ئاستەکە نوو. ھات گۆتن ژی، کۆمەک ئەندامێن پەکەکێ دێ ل سەر سینۆرێ ھەرێما کوردستانێ ب چالاکیەکێ بریارێن کۆنگرەیێ پێک بینن.
دەم پارتیێ دا زانین، ئەو ژ دەستپێکێ ڤە د پێڤاژۆیێ دە رۆلا ھێسانکاریێ دلیزن و ژ بۆ بەشداربوونا مەراسیمێ، وان ناڤێن 15-20 رۆژنامەڤانان لگەل نوونەرێن سازیێن جڤاکا سڤیل وەرگرتنە.
چەک تێن شەوتاندن، لێ خوەرادەستکرن نینە
ل گۆری ئاگاھیێن کو د مەدیایا نێزیکی پەکەکێ دە ھاتنە بەلاڤکرن، تێ تەخمینکرن کو مەراسیما چەکدانینێ د 10 یان 12ێ ڤێ مەھێ دە برێڤە بچە. د مەراسیمێ دە، تێ چاڤەرێکرن کو بەرپرسێن پایەبلندێن پەکەکێ ژی ئامادە بن و چەک ب ئاوایەکی سەمبۆلیک بێن شەوتاندن. ھاتە تەکەزکرن کو ئەندامێن بەشدار پشتی چالاکیێ دێ خوە رادەست نەکن و دێ ڤەگەرن جھێن خوە.
دەم پارتیێ ھەروھا دەستنیشان کر، ئەڤ چالاکیا چەکبەردانێ د بن ئاگاھداریا حکوومەتا ترکیەیێ دەیە. ژ بەر ڤێ یەکێ، بانگ ل رۆژنامەڤانێن کو دخوازن بەشداری مەراسیمێ ببن کر کو ناڤێن خوە تۆمار بکن، دا کو د دەما چوون و ھاتنێ دە رووبروویێ چ ئاستەنگیان نەبن.
