سەرۆککۆمارێ ترکیەیێ رەجەب تەییب ئەردۆگان راگھاند، ئەو دێ د رۆژێن پێش دا ژ بۆ گۆتووبێژکرنا قۆناغێن نوویێن پێڤاژۆیا ئاشتیێ، لگەل شاندەکا دەم پارتیێ و ب ئامادەبوونا سەرۆکێ میتێ بجڤە.
سەرۆککۆمارێ ترکیەیێ رەجەب تەییب ئەردۆگان، ئیرۆ 5ێ تیرمەھێ راگھاند، لگەل چەکدانینا پەکەکێ، دێ ل ترکیەیێ “قۆناغەکا نوو یا دەمۆکراسیێ” دەست پێ بکە و ئەڤ پێنگاڤە دێ پێڤاژۆیا ئاشتیێ لەزتر بکە.
ئەردۆگان دا زانین، ئەو دێ د رۆژێن پێش دە لگەل شاندەکە دەم پارتیێ بجڤە دا کو قۆناغێن داھاتوویێن پێڤاژۆیێ گۆتووبێژ بکن. ئەردۆگان ھەروھا ئەشکەرە کر کو د جڤینێ دە، سەرۆکێ سازیا ئیستخباراتا ترکیەیێ (میت) ژی دێ ئامادە بە.
ئەڤ داخویانیە پشتی داخویانیا بەردەڤکا دەم پارتیێ عایشەگول دۆگان ھات. دۆگان رۆژا 3ێ تیرمەھێ، د کۆنگرەیەکا رۆژنامەڤانی دە راگھاندبوو، رۆژێن پێش ژ بۆ پێڤاژۆیا چەکدانینێ “گەلەک گرینگ و دیرۆکی” نە.
ھەروھا گۆتبوو: “ل گۆری ئاگاھیێن کو گھیشتنە مە، ئامادەکاری ژ بۆ دەستپێکرنا پێڤاژۆیێ تێن کرن. ئەم دکەڤنە قۆناغەکا نوو و د ناڤا ھەفتەیا بێ دە دێ پێنگاڤێن گرینگ بێن ئاڤێتن. دێ ھەرکەس ببە شاھدێ ڤێ کێلیا دیرۆکی.”
پێڤاژۆیا ھەیی وەکە بەردەوامیا پێنگاڤا کو د 27ێ شوباتا 2025ێ دە ھاتبوو دەستپێکرن، تێ دیتن. د وێ دەمێ دە، شاندا ئیمرالیێ پشتی ھەڤدیتنا لگەل رێبەرێ پەکەکێ ئۆجالان، پەیاما وی ب زمانێن کوردی و ترکی خوەندبوو. د پەیامێ دە، بانگا دەستپێکرنا قۆناغەکا نوو یا پێڤاژۆیا ئاشتیێ ل ترکیەیێ ھاتبوو کرن، کو ئەڤ یەک وەکە پێنگاڤا داوی یا ژ بۆ داویانینا ل چالاکیێن چەکداری یێن پارتیا کارکەرێن کوردستانێ (پەکەکێ) ھاتبوو شیرۆڤەکرن.
