هەڤدیتنا شاندا دەم پارتیێ ل گەل ئۆجالان بداوی بوو

هەڤدیتنا شاندا دەم پارتیێ ل گەل رێبەرێ پارتیا کارکەرێن کوردستانێ (په‌كه‌كێ) یێ زیندانکری عه‌بدوللا ئۆجالان بداوی بوو و بریارە سبە ل گەل سەرۆککۆمارێ ترکیەیێ بجڤە.

ئەندامێن شاندا پارتیا وەکهەڤی و دەمۆکراسیا گەلان (دەم پارتی) ژ بۆ ئیمرالیێ پەروین بولدان، میتحه‌ت سانجار و ئۆزگور فائیک ئەرۆل ئیرۆ (یەکشەم، 06ێ تیرمەها 2025ێ) سەردانا ئیمرالیێ کر و ل گەل رێبەرێ پارتیا کارکەرێن کوردستانێ (په‌كه‌كێ) یێ زیندانکری عه‌بدوللا ئۆجالان هەڤدیتنەک لدار خست.

ل گۆر زانیاریان، هەڤدیتنا شاندا دەم پارتیێ ل گەل ئۆجالان دو ساعه‌ت و نیڤان بەردەوام بوویە و تێ چاڤەرێکرن ل سەر وێ جڤینێ داخویانیەکە نڤیسکی ژی بێ بەلاڤکرن.

تێ پێشبینیکرن کو ئەڤ سەردان گرێدایی پەیاما ئۆجالان بە کو بریارە د ڤێ هەفتەیێ دە پارڤە بکە. ئەڤ ژی د دەمەکێ دەیە کو بریارە د ڤێ هەفتەیێ دە هەژمارەکە چەکدارێن پارتیا کارکەرێن کوردستانێ (په‌كه‌كێ) د چارچۆڤەیا پێڤاژۆیا ئاشتیێ ل ترکیە و باکورێ کوردستانێ دە د مەراسیمەکێ دە ب ئامادەبوونا ئالیێن پەیوەندیدار و ل بەر چاڤێن مەدیایێ چەکێن خوە دانن.

بریارە ئەندامێن شاندا دەم پارتیێ ژ بۆ ئیمرالیێ پەروین بولدان و میتحه‌ت سانجار سبە ساعه‌ت 3:00ێ پشتی نیڤرۆیێ ل گەل سەرۆکۆمارێ ترکیەیێ رەجەب تاییب ئەردۆگان ژی بجڤن.

دەم پارتی راگهاند کو، بەریا هەڤدیتنێ، ئەندامێن شاندا ئیمرالیێ ل گەل هەڤسەرۆکێن دەم پارتیێ ژی دێ جڤینەکێ پێک بینن.

تەڤی کو پێشتر بریار بوو شاندا دەم پارتیێ پشتی هەڤدیتنا ب سەرۆککۆمارێ ترکیەیێ رەجەپ تاییپ ئەردۆگان رە سەردانا ئۆجالان بکە، لێ سەردانا ئیمرالیێ بەری هەڤدیتنا ب ئەردۆگان رە هات کرن بێ کو سەدەما وێ بێ ئەشکەرەکرن.

شاندا پارتیا وەکهەڤی و دەمۆکراسیا گەلان (دەم پارتی) ژ بۆ ئیمرالیێ پێشتر ژ بۆ جارا یەکێ ل رۆژا 28.12.2024ێ سەردانا ئیمرالیێ کر. پشتی وێ سەردانێ ژی، وێ شاندێ تەنێ د ئیسال دە چار جارێن دن ل رۆژێن 22.01.2025، 27.02.2025، 21.04.2025 و 18.05.2025ێ سەردانا ئۆجالان کریە.