هه‌ژمارا عه‌سكه‌رێن ترك ئه‌وێن كو دوهـ ل باشوورێ كوردستانێ راستی غازا مه‌تانێ هاتین و جانێ خوه ژ ده‌ست داین، گهیشت 12 عه‌سكه‌ران.
وه‌زاره‌تا پاراستنێ یا تركیێ ئیرۆ رۆژا دوشه‌می 7 تیرمه‌ها 2025ێ دخویانی دا و راگهاند، 7 عه‌سكه‌رێن دن یێن كو ل باشوورێ كوردستانێ ب غازا مه‌تانێ ژه‌هری كه‌تین جانێ خوه ژ ده‌ست دان، ب ته‌ڤاهی هه‌ژمارا عه‌سكه‌رێن كو بوونه قوربانی گهیشت 12 عه‌سكه‌ران.
د ئۆپه‌راسیۆنه‌كه لێگه‌رینێ ده، دوهـ رۆژا یه‌كشه‌می 6 تیرمه‌ها 2025ێ 19 عه‌سكه‌رێن ترك د شكه‌فته‌كێ ده كو ل بلنداهییا 852 مه‌تران بوون راستی گازا مه‌تانێ هاتن، 5 ژ وان جانێ خوه ژ ده‌ست دابوو.
ئیرۆ رۆژا دوشه‌می 7 عه‌سكه‌رێن دن ژی ل نه‌خوه‌شخانه‌یێ جانێ خوه وه‌ندا كرن.
شاندا ئیمرالیێ كو دوهـ سه‌ردانا ئیمرالیێ كربوو، په‌یاما ئۆجالان پارڤه‌كر، د به‌شه‌كێ په‌یامێ ده ئۆجالان گۆت: ئه‌و ژ بۆی مرنا عه‌سكه‌رێن ترك پڕ خه‌مگین بوویه و ئه‌و ره‌حمه‌تێ ژ بۆ عه‌سكه‌رێن جانێ خوه وه‌ندا كری دخوازه و سه‌رساخیێ ژ مالباتێن وان ره.
