چەتەیێن پەکەکێ یێن ب ناڤێ “جوانێن شۆرەشگەر” زارۆکەکی 12 سالی ل کۆبانێ رەڤاند و ب مەبەستا چەکدارکرنا وی د ناڤا رەفێن یەپەگێ دە ئەو زارۆک بەر ب کامپێن لەشکەرکرنا زارۆکان ڤە بر.
چاڤکانیێن پێگەها دارکا مازی ئەشکەرە کرن، رێخستنا چەتەیان یا ب ناڤێ “جوانێن شۆرەشگەر” کو راستەراست فەرمانا ژ پەکەکێ وەردگرە د 5/6/2025ێ دە، ل باژارێ کۆبانێ یێ رۆژئاڤا کوردستانێ زارۆکەکی 12 سالی ب ناڤێ «ئایدل ئەیمەن مستەفا» رەڤاندیە و هەیا نها چارەنڤیسا وی نەدیارە.
ل گۆر ئاگاهیێن دارکا مازی، پاش کو مالباتا ڤی زارۆکی داخوازێ ژ رێڤەبەریا رۆژئاڤا دکە زارۆکێ وان ڤەگەرینە ناڤا مالباتا وی دە، ژ ئالیێ “جوانێن شۆرەشگەر”ڤە ڤیدەئۆیەک هاتیە پارڤەکرن کو تێ دە ئەڤ زارۆک باس ل ڤێ یەکێ دکە کو ب کێفا دلێ خوە تەڤلی ناڤا رەفێن یەپەگێ بوویە و ژ بۆی ئازاداییا هەر چار پەرچێن کوردستانێ خەبات دکە.
چاڤکانیێن دارکا مازی هەر وەها ئەشکەرە کرن، زارۆکێ رەڤاندی ئەڤ داخویانی د بن فشار و زەختا چەتەیێن «جوانێن شۆرەشگەر» دایە و ب ت ئاوا ب کێفا دلێ خوە تەڤلی رەفێن یەپەگێ نەبوویە بەلکو ڤان چەتەیان ئەو ب دارێ زۆرێ رەڤاندییە و نەچار کرییە ڤێ داخویانیێ بدە.
تێ زانین ئەڤ نە جارا یەکەمە چەتەیێن پەکەکێ ب ڤی ئاوا تەڤ دگەرن و زارۆکێن رەڤاندی نەچار دکن د هندەک پارچە ڤیدەئۆیێن کورت دە ببێژن “ئەم ب کێفا دلێ خوە تەڤلی رەفێن یەپەگێ بوونە”، پێش نها ژی چەندین جاران ڤان چەتەیان زارۆکێن رەڤاندی نەچار کرنە ب ڤی ئاوا داخویانیا بدن.
