ھێزێن پێشمەرگە ل چیایێ قەرەچووخێ ئۆپەراسیۆنەکا بەرفرەھ ئەنجامدا

وەزارەتا پێشمەرگە راگھاند، لیوایا 14ێ یا پەیادە ژ بۆ ژناڤبرنا تەڤگەرا تەرۆریستان و دابینکرنا ئەولەھیێ، ل دەڤەرا چیایێ قەرەچووخێ ئۆپەراسیۆنەکا لێگەرین و پاقژکرنێ لدار خستیە.

وەزارەتا پێشمەرگە ئیرۆ 7ی تیرمەھێ د داخویانیەکێ دە دا زانین، ئۆپەراسیۆن رۆژا یەکشەمبێ، 6ی تیرمەھێ دەمژمێر 04:00ێ سبەھێ دەست پێ کریە. ئۆپەراسیۆن ژ ئالیێ لیوایا 14ێ یا پەیادە یا سەر ب فیرقەیا 1 ڤە، ب سەرپەرەشتیا فەرماندارێ لیوایێ عەمید روکن عەلمی مزووری ھاتیە برێڤەبرن.

د داخویانیێ دە ھات دەستنیشانکرن، ئارمانجا ئۆپەراسیۆنێ “تێکبرنا لڤ و تەڤگەرا تەرۆریستان و دابینکرنا ئەولەھیەکا زێدەتر ژ بۆ خەلک و گوندێن ھەرێمێ” بوویە. د چارچۆڤەیا ئۆپەراسیۆنێ دە، ل چیایێ قەرەچووخێ، گەلیێ تاراوایێ، مەلا کاخە و گوندێن سەر ب ھەرێمێ ڤە، لێگەرین و کۆنترۆل ل ستارگەھ و ڤەشارتگەھێن تەرۆریستێن داعشێ ھاتیە کرن.

وەزارەتێ ھەروھا راگھاند، ئۆپەراسیۆن د ھەمان رۆژێ دە دەمژمێر 08:00ێ سبەھێ ب سەرکەفتی بداوی بوویە.