کەجەکێ دەما مەراسیما چەکدانینێ ئەشکەرە کر

کۆما جڤاکێن کوردستانێ (کەجەکێ) دیار کر کو مەراسیما چەکدانینێ سبەھا رۆژا ئینێ 11ێ تیرمەھا 2025ێ، دێ ل ناڤچەیا راپەرین یا سلێمانیێ هێت ئەنجامدان.

پێش نها هاتبوو ئەشکەرەکرن کو کۆمەکا گەریلایێن پەکەکێ دێ د ناڤبەرا 9ێ هەتا 12ێ تیرمەھێ دە وەکە نیشاندانا “نییەت پاکیێ” ب مەراسیمەکێ چەکێن خوە دەینن.

 بریار بوو کو ئەڤ مەراسیم ب ئامادەبوونا رۆژنامەگەران و ب ئاوایەکی زیندە وەرە وەشاندن، لێ بەلێ دوهی رۆژا دوشەمی 7/8/2025، کەجەکێ راگھاند، ژ بەر “رەوشا ئەولەھیێ” رۆژنامەگەر نکارن راستەراست ل قادا مەراسیمێ ئامادە بن و وەشانا زندی ژی نایێ کرن.

ل گۆر ئاگاهییان، هەژمارا گەریلایێن پەکەکێ یێن کو دێ د 11ێ تیرمەهێ دە چەکێن خوە دەینن د ناڤبەرا 20 هەتا 30 گەریلایاندایە.

کەجەکێ د داخویانیا خوە دە گۆت، “ل جھەکی نێزیکی مەراسیمێ دێ ئەکرانەکی مەزن بێ ئامادەکرن و پشتی مەراسیمێ دیمەنێن تۆمارکری دێ ل سەر وێ ئەکرانێ  بێن نیشاندان. ئەڤە تاکە رێیە کو رۆژنامەگەر بکارن زانیاریان ژێ وەرگرن.”