رزگار بابمیری، پێژمان سولتانی، سۆران قاسمی، کاوە سالحی و تەیفوور بابامیری پێنج تۆهمەتبارێن سیاسی یێن کورد و خەلکێ باژارێ بۆکانێ ژ ئالیێ دەزگەها دادوەری یا کۆمارا ئیسلامی یا ئیرانێ ڤە ب سزایێ دارڤەکرنێ و سەرهەڤ ب 75 سال گرتیگەهێ هاتنە سزادان. پێنج کەسێن دن یێن ڤێ دۆسیەیێ ب سزایێ گرتیگەهێ هاتنە سزادان.
سازیا مافێ مرۆڤی یا هەنگاوێ راگه‌هاند، تەیفوور سەلیمی بابامیری یێ تەمەن 47 سالی، سۆران قاسمی یێ تەمەن 28 سالی، پێژمان سولتانی یێ تەمەن 30 سالی، کاوە سالحی یێ تەمەن 40 سالی و رزگار بابامیری یێ 42 سالی هەر یەک ژ ئالیێ تایا یەکەم یا دادگەها شۆرەشا ئورمیێ ڤە ب تۆهمەتێن وەک «بەخی و مهاربە» ب دارڤەکرنێ و ب تۆهمەتا «ئەندامەتی ل گرووپێن تەرۆریستی» هەر یەک ب سزایێ 15 سال گرتیگەهێ هاتنە سزادان.
هێژایی بەحسکرنێ یە کو، هەر یەک سۆران قاسمی، کاوە سالحی و پێژمان سولتانی ب سێ جار سزایێ دارڤەکرنێ، رزگار بابامیری ب دو جار سزایێ دارڤەکرنێ و تەیفوور سەلیمی بابمیری کو نها ب بارمتەیا پێنج ملیار تومەنی هاتیە بەردان ب جارەک سزایێ دارڤەکرنێ هاتنە مەحکوومکرن.
ئەڤ سزایە رۆژا دوشەمی 7ێ هەزیرانا 2025ان، ب ئاوایەکی فەرمی ژ پارێزەرێن وان رە هاتیە راگهاندن.
د ڤێ ناڤبەرێ دە پێژمان سولتانی بەرێ د دۆسیەیەک دن دە ژ ئالیێ تایا یەکەم یا دادگەها تاوانان یا تایبەت ب جوانان ڤە ل ئورمیێ سزایێ دارڤەکرنێ ب سەر دە هاتبوو سەپاندن.
هەروسا رزگار بەیگزادە بابامیری و سۆران قاسمی ب تۆهمەتا «بەشداری ل کوشتنێ» هەر یەک ب 15 سال و 10 سال و یەک رۆژ گرتیگەهێ هاتبوونە سزادان. کاوە سالحی یەک دن ژ تۆهمەتبارێ ڤێ دۆسیەیێ ژ ڤان تۆهمەتان بێ تاوان هاتیە ناساندن.
هەڤدەم کۆمبوونا پێداچوون ب تۆهمەتێن پێنج تۆهمەتبارێن سیاسی یێن دن و خەلکێ بۆکانێ یێن ب ناڤێن هێمن کرمانج، ئەحمەد مامزادە یێ تەمەن 65 سالی، ئەبووبەکر مامزادە یێ تەمەن 53 سالی، جەلیل مەولوودی و جوامێر مام خوسرەوی یێ 50 سالی هاتیە برێڤەچوون کو سزایێن وان دێ ژ ئالیێ هەنگاوێ ڤە بێ بەلاڤکرن.
جوامێر مام خوسرەوی ل رێکەفتا 26ێ ئادارا 2023ان، هێمن کرمانج ل رێکەفتا 18ێ نیسانێ و رزگار بابامیری و جەلیل مەولوودی ل 16ێ نیسانێ و ئەحمەد مامزادە، ئەبووبەکر مامزادە، سۆران قاسمی، پێژمان سولتانی و کاوە سالحی ل 15ێ نیسانا هەمان سالێ هاتبوونە گرتن و بۆ گرتیگەها ئورمیێ هاتبوونە ڤەگوهاستن.
تەیفوور سەلیمی بابمیری ژی، ل شباتا 2023ان ژ ئالیێ هێزێن ئەولەهی ڤە ب بێ هەبوونا ت بەلگەیەکە یاسایی ل بانە هاتبوو گرتن.
ئەڤ کەسانە چەند مەهـ پشتی تەڤگەرا ژن ژیان ئازادی و هەر د ڤێ دەرهەقێ دە ژ ئالیێ ناڤەندێن ئەولەهی یێن کۆمارا ئیسلامی یا ئیرانێ ڤە هاتبوونە گرتن و بۆ هەیاما چەند مەهان ب ئاوایێ زۆرێ هاتبوونە بێسەرووشوونکرن و ب توندی راستی ئیشکەنجە و نەچار ب ئیترافا ب زۆرێ ل دژی خوە هاتبوون.
