چەتەیێن پەکەکێ یێن ب ناڤێ رێخستنا “جوانێن شۆرەشگەر” تەڤ دگەرن، 4 زارۆکێن تەمەن بچووک ل رۆژئاڤایێ کوردستانێ و ناڤچەیێن د بن کۆنترۆلا یەپەگێ دە رەڤاندن و بەر ب کامپێن چەکدارکرنا زارۆکان ڤە برن.
ل گۆری چاڤکانیێن مەدیایی، چەتەیێن پەکەکێ “جوانێن شۆرەشگەر” د 12ێ خزیرانا 2025ێ دە، محەمەد شەوقی یووسف یێ 12 سالی ژ تاخا شێخ مەقسوودا حەلەبێ رەڤاندیە. محەمەد شەوقی ژ گوندێ ئاراندا یێ ناڤچەیا شیەت یا عەفرینێ یە.
ل گۆری هەمان چاڤکانییان، چەتەیێن پەکەکێ د 29ێ خزیرانا 2025ێ دە ژی، ئاری مەحموود عۆسمان شالاش یێ 14 سالی هەر ژ تاخا شێخ مەقسوودا حەلەبێ رەڤاندیە و بەر ب کامپێن چەکدارکرنا زارۆکان ڤە برییە.
رەڤاندنا ئاری مەحموود د دەمەکی دە تێ کو د سالا 2015ێ دە ڤان چەتەیێن پەکەکێ برایێ وی ژی کو ب تەنێ 14 سالی بوو رەڤاندیە و هەیانی نها چارەنڤیسا وی نەدیارە.
هەر وەها د 31ی گۆلانا 2025ێ دە، ڤان چەتەیان زارۆکەکی دن یێ 16 سالی کو نەخوەش بوویە، ل حەلەبێ رەڤاندییە، ناڤێ ڤی زارۆکی جەمیل کیلۆ یە و مالباتا وی ل گەندێ قیلەت یێ ناڤچەیا جندرێسێ یێ سەر ب عەفرینێ ڤە دژی.
ل باژارێ حەسەکێ ژی ڤان چەتەیان زارۆکەکی دن یێ 12 سالی ب ناڤێ خەلیل ئەحمەد ل بەر دەریێ دەبستانا وی رەڤاندییە.
مالباتێن ڤان زارۆکان ژ بۆی زانینا چارەنڤیسا زارۆکێن خوە سەری ل سازیێن پەیەدێ دان، لێ بەلێ نەکارین ت ئاگاهیان دەربارێ چارەنڤیسا زارۆکێن خوە بزانبن، تەڤی کو مالباتێن ڤان زارۆکان داخواز ژ مەزلووم عەبدی فەرماندارێ گشتی یێ هەسەدێ ژی کر کو د هەوارا وان هەرە و زارۆکێن وان ژ وان رە ڤەگەرینە، لێ هەیانی نها داخوازا وان وەک خوە مایە و ت کەس و ئالی د هەوارا وان نەچوونە و چارەنڤیسا زارۆکێن وان هینا ژی نەدیارە.
