دادگەھا مافێن مرۆڤان یا ئەورۆپایێ د 8ێ تیرمەھێ دە جارەکە دن تەکەز کربوو کو گرتنا ھەڤسەرۆکێ بەرێ یێ پارتیا دەمۆکراتیکا گەلان (ھەدەپێ) سەلاحەدین دەمیرتاش ژ ئالیێ ترکیەیێ ڤە بنپێکرنا مافانە.
ل سەر ڤێ بریارێ، کۆمیسیۆنا حقووق و مافێن مرۆڤان یا دەم پارتیێ سەری ل دادگەھا 22یێ یا سزایێن گران یا ئەنقەرەیێ دا و داخوازا بەردانا سەلاحەدین دەمیرتاش و ھەڤسەرۆکا بەرێ یا ھەدەپێ فیگەن یوکسەکداگ کر، کو نھا د چارچۆڤەیا دۆزا کۆبانییێ دە گرتی نە.
جێگرێ ھەڤسەرۆکێن دەم پارتیێ ئۆزتورک تورکدۆگان تەکەزی ل سەر وێ یەکێ کر کو دادگەھا مافێن مرۆڤان یا ئەورۆپایێ د بریارا خوەیا چارەمین یا دەربارێ دەمیرتاش دە راگھاندیە کو “ئەڤ گرتن نە رەوایە و سەدەمێن وێ سیاسی نە.”
تورکدۆگان ھەر وھا دیار کر، دادگەھا مافێن مرۆڤان یا ئەورۆپایێ د بریارا خوە دە راستەراست دەستنیشان کریە کو گرتنا دەمیرتاش د ڤێ دۆزێ دە بێحقووقییە و گۆت: “ژ بەر کو دۆز ل بەر دەستێ دادگەھێیە، دڤێت دادگەھ بێیی درەنگخستنێ بریارا بەردانێ بدە. ئەم پێشبینی دکن کو ھەفتەیا بێ دەمیرتاش بێ بەردان.”
دەمیرتاش ژ 4ێ مژدارا 2016ێ ڤە ژ بەر دۆزا کۆبانێ ل گرتیگەھا ئەدیرنەیێ گرتییە. رۆژا 7ێ گولانێ یا بۆری ژی ژ ئالیێ دادگەھا سزایێن گران یا ئەنقەرەیێ ڤە 42 سال سزایێ گرتیگەھێ لێ ھات برین. ھەروھا دادگەھێ سزایێن 30 سال ل ھەڤسەرۆکا بەرێ یا ھەدەپێ فیگەن یوکسەکداگ بریبوو.
