دژەتەرۆرا کوردستانێ راگهاند، ئیرۆ ل سینۆرێ پارێزگەها دهۆک و ئیدارەیا سەربخوە یا زاخۆیێ، ب چەند درۆنێن بۆمبەکری ئێریش ل سەر سێ کێلگەهێن پەترۆلێ هاتنە کرن. د ئەنجاما ئێریشان دە زیانێن مادی چێبوون، لێ ت زیانێن جانی نەهاتن تۆمارکرن.
رێڤەبەریا دژەتەرۆرا کوردستانێ د داخویانیەکێ دە ئەشکەرە کر، ئیرۆ 16ێ تیرمەها 2025ان، د ناڤبەرا ساعەت 06:00 و 07:15ێ دە، ب چار درۆنێن بۆمبەکری ئێریشی سێ کێلگەهێن پەترۆلێ یێن ل سینۆرێ پارێزگەها دهۆک و زاخۆیێ هاتیە کرن.
ل گۆری داخویانیێن دژەتەرۆرێ، ئێریش ب ڤی رەنگی پێک هاتنە:
– ساعەت 06:00 و 06:15ێ سبێ: ب دو درۆنێن بۆمبەکری ئێریش ل سەر کێلگەها پەترۆلێ یا کۆمپانیایا DNO یا ل پێشخابوورێ، ل سینۆرێ ئیدارەیا سەربخوە یا زاخۆیێ، هاتیە کرن.
– ساعەت 07:00ێ سبێ: ب درۆنەکە دنا بۆمبەکری، ئێریش ل سەر کێلگەها پەترۆلێ یا DNO یا ل تاوکێ، کو ئەو ژی دکەڤە سینۆرێ ئیدارەیا سەربخوە یا زاخۆیێ، پێک هاتیە.
– ساعەت 07:14ێ سبێ: ب درۆنەکە بۆمبەکری، کێلگەها پەترۆلێ یا کۆمپانیایا ئامەریکی “هاند ئۆیل”ا ل باعەدرێ، سەر ب قەزایا شێخان یا پارێزگەها دهۆکێ، هاتیە ئارمانجکرن.
دژەتەرۆرا کوردستانێ دا زانین، د ئێریشێن ل سەر کێلگەهێن DNO یێ دە زیانێن مادی چێبوونە، لێ ئێریشا ل سەر کێلگەها “هاند ئۆیل” ت زیانێن جانی و مادی ب خوە رە نەئانیە.
سەرۆکاتیا هەرێمێ ئێریشان شەرمەزار دکە
ئەڤ ئێریش د دەمەکێ دە تێن کو د دەمێن داوی دە هەژمارا ئێریشێن ب درۆنان ل سەر کێلگەهێن پەترۆلێ و ناڤچەیێن جودا یێن هەرێما کوردستانێ زێدە بوونە.
دەربارێ ڤان ئێریشان دە، سەرۆکاتیا هەرێما کوردستانێ دوهـ، 15ێ تیرمەهێ، داخویانیەک بەلاڤ کربوو و ئەڤ کریار ب توندی شەرمەزار کربوون. د داخویانیێ دە هاتبوو خوەستن کو “دڤێ حکوومەتا فەدەرالا ئیراقێ هەموو رێکارێن بلەز و پێویست ب جهـ بینە دا کو رێ ل ڤان ئێریشان بگرە و ئێریشکاران ئەشکەرە بکە و وان جەزا بکە.”
سەرۆکاتیێ هەروها تەکەز کربوو کو ئەڤ ئێریش “ئارامی و سەروەریا وەلات و وەبەرهێنانا ناڤخوەیی و بیانی دخن خەتەرێ.”
