رۆژنامەیەکە نێزیکی حکوومەتا ترکیەیێ رادگهینە، کۆمیسیۆنا کو تێ پێشبینی كرن ل پارلامەنێ ژ بۆ “پرۆسەیا نوو یا ئاشتیێ” وەرە ئاڤاکرن، دێ دەستوورا بنگەهین نەگوهەرینە و ئارمانجا وێ یا سەرەکە تەنێ ئامادەکرنا چارچۆڤەیەکە یاسایییە ژ بۆ چەکدانین و هلوەشاندنا په‌كه‌كێ.
یەک ژ گاڤێن هەری گرینگێن “پرۆسەیا نوو یا ئاشتیێ”، ئاڤاکرنا کۆمیسیۆنەکە پارلامەنێ یە کو رەفۆرمێن یاسایی پێک بینە و پێڤاژۆیێ ب پێش ڤە ببە. هەر چەند ئەڤ گاڤ وەکی هێڤیەکێ ژ بۆ چارەسەرکرنا بەشەک ژ پرسگرێکێن کوردان ل ترکیەیێ و باکورێ کوردستانێ تێ دیتن ژی، رۆژنامەیا “حوڕیەت” یا نێزیکی دەستهلاتێ، ئارمانجێن ڤێ کۆمیسیۆنێ ب ئاوایەکی دن ئەشکەرە کر.
ل گۆری رۆژنامەیێ، ئەرکێ سەرەکی یێ کۆمیسیۆنێ نە سەرەراستکرنا دەستوورێیە، ب تایبەتی ژی چار مادەیێن یەکەمێن دەستوورێ کو بەشەک ژ داخوازێن کوردان پێک تینن. رۆژنامەیێ تەکەز کر، کۆمیسیۆن دێ تەنێ ژ بۆ ئامادەکرنا زەمینەکە یاسایی یا چەکدانینا په‌كه‌كێ بخەبتە.
رەفۆرمێن یاسایی، لێ بێ لێبۆرینا گشتی
رۆژنامەیا “حوڕیەت” دەربارێ ناڤەرۆک و کارێن کۆمیسیۆنێ دە هن هوورگلی بەلاڤ کرن:
کارێ کۆمیسیۆنێ: تێ پێشبینی كرن کو کۆمیسیۆن د بێهنڤه‌دانا هاڤینێ دە دەست ب کار بکە و هەتا مەها جۆتمەهێ کو پارلامەنتۆیێ ژ نوو ڤە ڤەدبە، دێ ئامادەکاریێن خوە بدۆمینە. رەفۆرمێن یاسایی دێ ژ مەها جۆتمەهێ و پێ ڤە دەست پێ بکن.
گوهەرتنێن یاسایی: ل گۆری رۆژنامەیێ، تێ چاڤەرێکرن کو د یاسایا تێکۆشینا ل دژی تەرۆرێ و یاسایا جەزایێ دە هن گوهەرتن وەرن کرن. زێدەیی 5 هەزار ئەندامێن په‌كه‌كێ د گرتیگەهان دەنە و هەر گوهەرتنەکە یاسایی دێ باندۆرێ ل وان بکە.
رەوشا گرتیان: هات راگهاندن کو بەشەک ژ گرتیان دەما جەزایێ خوە تەمام کرنە، لێ ژ بەر ئەندامەتیا په‌كه‌كێ بەردانا وان هاتیە پاشخستن. ب رەفۆرمێن یاسایی رە، تێ پێشبینی كرن کو یێن جەزایێ خوە قەداندنە بێن بەردان، لێ هات تەکەزکرن کو ت لێبۆرینەکە گشتی د پرۆسەیێ دە جهـ ناگرە.
دەستوور نایێ گوهەرتن: هەمان چاڤکانی ئەو دەنگۆیێن کو دبێژن کۆمیسیۆن دێ دەستوورێ بگوهەرینە رەد کرن و ئانی زمان کو ت گوهەرتن د چار مادەیێن یەکەمێن دەستوورێ و مادەیا 66ان یا دەربارێ پێناسەیا “ترکبوونێ” دە چێنابن.
ئەڤ نیقاش د دەمەکێ دە تێن کو رۆژا ئینێ یا بۆری، 11ێ تیرمەها 2025ان، کۆمەکە ژ 30 ئەندامێن په‌كه‌كێ ل شکەفتا جاسەنەیێ یا ل پارێزگەها سلێمانیێ د مەراسیمەکێ دە چەکێن خوە دانیبوون. وان داخواز کربوو کو ب رێیا یاسایێ زەمین ژ وان رە وەرە ئامادەکرن، دا کو کاربن ژ تێکۆشینا چەکداری دەرباسی تێکۆشینا یاسایی ببن.
تێ چاڤەرێکرن کو د رۆژێن پێش دە، کۆمیسیۆنەکە پارلامەنتۆیێ ب نوونەرتیا پرانیا پارتیان ژ بۆ ڤێ مەبەستێ وەرە ئاڤاکرن.
