فەرماندارێ گشتییێ ھێزێن سووریەیا دەمۆکراتیک (ھەسەدێ) دبێژە، “کوشتنا ژن و زارۆکان و دەستدرێژیکرنا ل سەر سەمبۆلێن ئۆلی تاوانێن ل دژی مرۆڤاھیێ و نرخێن سووریەیێ نە.” ئاماژەیێ ژی ددە، “پشتی 14 سالێن شەر، دەم ھاتیە کو خوینرژاندن ل سووریەیێ بێ راوەستاندن.”
فەرماندارێ گشتییێ ھێزێن سووریەیا دەمۆکراتیک (ھەسەدێ) ئیرۆ چارشەمبێ، 16ێ تیرمەھا 2025ێ، ل سەر حەسابا خوە یا تۆرا جڤاکی یا X نڤیسیە، “ئەم ل سووەیدایێ بانگ ژ گەلێ خوە وەردگرن، ژ بۆ پەیداکرنا رێیەکا ئەولە ژ سڤیلان رە و راوەستاندنا ئێریشان.”
فەرماندارێ گشتییێ ھەسەدێ ئاماژە ژی دایە، “کوشتنا ژن و زارۆکان و دەستدرێژیکرنا ل سەر سەمبۆلێن ئۆلی تاوانێن ل دژی مرۆڤاھیێ و نرخێن سووریەیێ نە، لەوما دڤێت ئەڤ کریارێن شەرخوازانە یەکسەر بێن راوەستاندن و لێکۆلین لگەل بەرپرسیاران بێن کرن.”
مەزلووم عەبدی رۆن ژی کریە، “پشتی 14 سالێن شەر، دەم ھاتیە کو خوینرژاندن ل سووریەیێ بێ راوەستاندن. سووریە دێ نە ب تۆلھلدانێ، لێ ب دانووستاندنان و ھەڤفێمکرنێ پێش بکەڤە.
ناڤبری تەکەز ژی کریە، “پرسا گەلێ مەیێ درووز پرسەکە نەتەوەیییە و دڤێت چارەسەریا وێ ب رێیا دەستوورا وەلات و دیالۆگێ بە.”
ژ رۆژا یەکشەمێ، 13ێ تیرمەھا 2025ێ ڤە، ل پارێزگەھا سووەیدایێ یا سووریەیێ د ناڤبەرا عەشیرێن چەکدارێن درووز و بەدەویان دە شەرێن دژوار قەومین.
رەوانگەھا سووریەیێ یا مافێن مرۆڤان ژی پێشتر گۆتبوو، “پشتی رەڤاندنا جوانەکی دروورز ل سەر رێیا سەرەکەیا کو شام و باژارێ سووەیدایێ ب ھەڤ ڤە گرێ ددە، توندووتووژی ل پارێزگەھا سووەیدایێ زێدە بوویە.”
وەزارەتا بەرگریێ یا سووریەیێ ژی ھێزا لەشکەری شاندیە وێ دەڤەرێ دا کو وان گرژیان کۆنترۆل بکە.
