دژەتەرۆرا کوردستانێ راگهاند، درۆنەکە بۆمبەکری ل نێزیکی ناڤچەیا بەحرکێ یا هەولێرێ کەتیە خوارێ و تەکەز کر، ت زیانەکە جانی و مادی چێنەبوویە.
ل گۆری داخویانیا دژەتەرۆرا کوردستانێ، “بەربانگا ئیرۆ پێنجشەمێ، 17ێ تیرمەهێ ساعەت 01:27، درۆنەکە بۆمبەکری ل نێزیکی گوندێ جێژنیکانێ سەر ب ناڤچەیا بەحرکێ یا پارێزگەها هەولێرێ ڤە کەتیە خوارێ.”
د داخویانیێ دە هات تەکەزکرن، “ب خوەشبەختی، ژ بەر کەتنا درۆنێ ت زیانەکە جانی و مادی چێنەبوویە.”
ئەڤ بوویەر د چارچۆڤەیا زنجیرەیەک ئێریشێن ب درۆنان دە پێک تێ. ئێڤارا دوهـ چارشەمێ، 16ێ تیرمەهێ، دەردۆرا ساعەت 19:10ان، ب درۆنەکە بۆمبەکری ئێریشی سەر کێلگەها پەترۆلێ یا ئامەریکی “هونت ئۆئل” ل باعەدرێ، ل ناڤچەیا شێخان یا سەر ب پارێزگەها دهۆکێ ڤە، هاتبوو کرن. د وێ ئێریشێ دە تەنێ زیانێن مادی چێبووبوون.
هەمان رۆژێ دانێ سبەهێ، ب چار درۆنێن بۆمبەکری، ئێریشی سەر سێ کێلگەهێن دن یێن پەترۆلێ هاتبوو کرن؛ دو ژ وان ل سینۆرێ ئیدارەیا سەربخوە یا زاخۆیێ و یا دن ژی ل ناڤچەیا شێخان یا پارێزگەها دهۆکێ بوون.
د رۆژێن داوی دە، ئێریشێن ب درۆنێن بۆمبەکری ل سەر باژارێن هەرێما کوردستانێ، ب تایبەتی ل سەر کێلگەهێن پەترۆلێ، بەردەوامن. هەر چقاس سەرۆکوەزیرێ ئیراقێ محەمەد شه‌یاع سوودانی ژ بۆ لێکۆلینکرنا ڤان ئێریشان کۆمیتەیەک تایبەت پێک ئانیبە ژی، لێ بەلێ هەتا نها د دەربارێ ئاراستەکرنا درۆنان دە نە کەس هاتیە گرتن و نه ژی کەس هاتیە جەزاکرن.
