سەرۆک مەسعوود بارزانی ئیرۆ 17ێ تیرمەهێ پێشوازی ل بالیۆزێ ترکیەیێ یێ ل ئیراقێ ئانل بۆرا ئینان و شاندا پێ رە کر. د جڤینێ دە، رەوشا سیاسی یا هەرێمێ و ب تایبەتی پێڤاژۆیا ئاشتیێ یا ل ترکیەیێ هاتن گۆتووبێژکرن.
د جڤینێ دە، کو کۆنسولێ گشتی یێ ترکیەیێ یێ ل هەولێرێ ئەرمان تۆپچو ژی ئامادە بوو، گوفتووگۆ ل سەر پێشهات و رەوشا سیاسی یا هەرێمێ و تێکلیێن د ناڤبەرا حکوومەتا هەرێما کوردستانێ و حکوومەتا فەدەرالا ئیراقێ دە هاتن کرن.
خالەکە دن یا گرینگ یا جڤینێ، پێڤاژۆیا چارەسەریا ئاشتیێ یا ل ترکیەیێ بوو. د ڤێ دەربارێ دە، بالیۆزێ ترکیەیێ سپاسیا سەرۆک بارزانی کر ژ بەر رۆلا وی یا گرینگ یا کو د سالێن بۆری دە د پشتگریکرنا پێڤاژۆیا ئاشتیێ دە لیستیە.
د هەڤدیتنێ دە هەروها بەحسا تێکلیێن دوئالی یێن د ناڤبەرا هەرێما کوردستانێ و ترکیەیێ دە ژی هاتە کرن.
