فراکسیۆنا پارتیا دەمۆکراتا کوردستانێ ل پارلامەنتۆیا ئیراقێ، داخوازا لدارخستنا جڤینەکە ئاوەرتە یا پارلامەنتۆیێ دکە ژ بۆ گۆتووبێژکرنا ئێریشێن ب درۆنان یێن ل سەر هەرێما کوردستانێ. فراکسیۆن تەکەز دکە کو ئەڤ ئێریش سەروەری، ئاساییش و ئارامیا ئیراقێ تێک ددن.
فراکسیۆنا په‌ده‌كێ ل پارلامەنتۆیا ئیراقێ، ئیرۆ 17ێ تیرمەهێ داخویانیەک دەربارێ ئێریشێن ب درۆنان یێن ل سەر کێلگەهێن پەترۆلێ و بنەسازیا ئابۆری یا هەرێما کوردستانێ بەلاڤ کر.
د داخویانیا فراکسیۆنا په‌ده‌كێ دە هاتیە: “د چارچۆڤەیا زەختێن ئابۆری یێن نەرەوا دە یێن ل سەر هەرێما کوردستانێ، د چەند رۆژێن بۆری دە، ب رێیا درۆنێن بۆمبەکری، هەژمارەک ئێریشێن تەرۆریستی هاتنە کرن سەر هەژمارەک سازیێن گرینگ ل هەرێما کوردستانێ، د ناڤ وان دە ژی بنەسازیا ئابۆری، پارزوونگەهێن پەترۆلێ، چاڤکانیێن ئەنەرژیێ.”
فراکسیۆنا په‌ده‌كێ داخوازا لدارخستنا جڤینەکە ئاوەرتە یا پارلامەنتۆیا ئیراقێ دکە “ژ بۆ گۆتووبێژکرنا ڤان پێشهاتێن مەترسیدار و چاڤدێریکرنا رێکارێن حکوومەتێ یێن دەربارێ ڤێ مژارێ دە”، ئەڤ ژی ب مەبەستا “بهێزکرنا رۆلا دەستهلاتا یاسادانینێ د پاراستنا وەلات و وەلاتیان دە.”
د هەمان دەمێ دە فراکسیۆنا په‌ده‌كێ بەحسا وێ یەکێ ژی کریە: “ژ بەر بەرپرسیاریا مە یا نشتمانی، ئەم داخوازێ ژ حکوومەتا فەدەرال دکن کو بەرپرسیاریا خوە یا دەستووری د پاراستنا ئاساییش و ئارامیا وەلات دە هلگرە و پێنگاڤێن جدی ژ بۆ راوەستاندنا ئێریشان باڤێژە؛ هەروها ئێریشکاران ئەشکەرە بکە و وان رووبروویی یاسایێ بکە.”
فراکسیۆنێ ئێریشێن ب درۆنان یێن ل سەر هەرێما کوردستانێ وەکە “پێشهاتەکە مەترسیدار ژ بۆ سەروەریا ئیراقێ و ئەولەهی و ئارامیا وێ” ب ناڤ دکە و تەکەز کریە کو ئێریش زرارەکە مەزن دگهینن دامارا ئابۆریا ئیراقێ.
دەربارێ کەسێن کو ل پشت ئێریشانن ژی، فراکسیۆنێ بەحسا وێ یەکێ کریە: “گەلەک ب زەلالی دیارە، ئەو کەسێن ل پشت ئێریشانن، ب ت رەنگەکی نە نشتمانپەروەرن، بەلکی ژ بۆ جیبجیکرنا ئاژاندایێن کو خزمەتا بەرژەوەندیێن وان یێن تەنگ دکن ل سەر حەسابێ گەلێ ئیراقێ و یەکرێزیا وی کار دکن.”
ژ دەستپێکا ڤێ مەهێ ڤە، رۆژانە ئێریشێن ب درۆنان ل دژی فرۆکەخانە و کێلگەهێن پەترۆلێ یێن هەرێما کوردستانێ تێن کرن. هەر چقاس سەرۆکوەزیرێ ئیراقێ محەمەد شه‌یاع سوودانی ژ بۆ لێکۆلینێ کۆمیتەیەک پێک ئانیبە ژی، لێ هەتا نها د دەربارێ ئاراستەکرنا درۆنان دە، نە کەس هاتیە گرتن و نه ژی کەس هاتیە جەزاکرن.
