ھەڤسەرۆکێ گشتی یێ دەم پارتیێ تونجەر باکرھان دیار کر، تەڤی ھندەک کێماسیان، ھەکە پێڤاژۆ ب سەر بکەڤە دێ وەلات دەمۆکراتیک ببە، لێ تەکەز کر ئەو پشتگریێ نادن دەستوورەکا بنگەھین یا کو چارەسەریا پرسا کورد تێ دە نەبە.
ھەڤسەرۆکێ گشتی یێ دەم پارتیێ تونجەر باکرھان دەربارێ پێڤاژۆیا بێچەکبوونا پەکەکێ، کۆمیسیۆنا کو دێ ل مەجلیسێ بێ ئاڤاکرن و نیقاشێن دەستوورا بنگەھینا نوو دە ئاخڤی.
شەرتێ سەرەکە ژ بۆ دەستوورا بنگەھین: چارەسەریا پرسا کورد
باکرھان دەستنیشان کر، پێویستیا ترکیەیێ ب دەستوورەکا بنگەھین یا دەمۆکراتیک ھەیە، لێ ئەو پشتگریێ نادن دەستوورەکە کو ڤان تایبەتمەندیان نەحەوینە. ھەروھا تەکەز کر کو ھەکە د دەستوورا بنگەھینا نوو دە چارەسەریا پرسا کورد جھ نەگرە، ئەو ژێ رە نابێژن “ئەرێ”.
بانگا ل جەهەپێ: کی ژ کورسیێ دانوستاندنێ برەڤە، وندا دکە
دەربارێ کۆمیسیۆنا کو پلانکرییە ل مەجلیسێ بێ ئاڤاکرن دە، باکرھان گۆت کو دڤێت جەهەپێ ژی د ناڤ دە جھ بگرە و گۆت: “دڤێت ئەم پشتگریێ بدن ڤێ پێڤاژۆیێ. بێگومان دڤێت جەهەپە ھەبە و ئەز باوەرم ئەو دێ ل سەر مێزەیی بن. پێویستە مرۆڤ ل سەر مێزەیێ تێبکۆشە. مێزە وەکە کورسیێ دانوستاندنێ سیاسەتێیە. کی ژ کورسیێ دانوستاندنێ برەڤە، وندا دکە. ھەکە ئەم دخوازن ئاشتیێ ب دەست بخن، دڤێت ئەم ل سەر میندەرێ بن.”
“گەر پێڤاژۆ سەرکەفتی بە، دێ دەمۆکراسی بێ”
باکرھان بال کشاند سەر ھندەک کێماسیێن د پێڤاژۆیێ دە و گۆت: “پێڤاژۆ هێژ د دەستپێکێ دەیە. ئەم ھەول ددن کو پێڤاژۆ ب پێش بکەڤە، لێ پێڤاژۆیەکا بێکێماسی نینە. ھندەک فکار و گومان دەردکەڤن ھۆلێ.”
لێبەلێ، دەربارێ ئەنجاما پێڤاژۆیێ دە ب ھێڤی ئاخڤی و گۆت: “ئەز پر ئەشکەرە دبێژم؛ ھەکە ئەڤ پێڤاژۆ ب سەر بکەڤە، ژ نوو ڤە نەیێ راکرن دۆلابا جەمەدێ، ئۆپۆزسیۆن ژی پشتگریێ بدە و ھەموو دینامیکێن جڤاکێ ببن ئالیکار، دێ دەمۆکراسی وەرە ترکیەیێ. ترکیە دێ وان چاڤکانیێن کو ژ بەر پرسا کورد خەرج دکە، بدە کەدکاران و بندەستان.”
