ڤیدیۆیەکا برایێ عەڤدللا ئۆجالان، محەمەد ئۆجالان، ل سەر مەدیایا پەکەکێ یا ل ئەورۆپایێ ھاتە وەشاندن. د وەشانێ دە، محەمەد ئۆجالان بەحسا ھەڤدیتنا خوە یا داوی یا مالباتێ لگەل ئۆجالان دکە. ھات ئیدیعاکرن کو ئۆجالان گۆتیە، “یێن ل رۆژئاڤا نکارن چەکێن خوە دەینن.”
د 7ێ تیرمەھێ دە، عەڤدللا ئۆجالان لگەل مالباتا خوە جڤیا. ئۆجالان، سەرۆکێ پەکەکێ کو ھاتیە هلوەشاندن، لگەل برایێ خوە محەمەد ئۆجالان جڤیا. د 12ێ تیرمەھێ دە، ل گوندێ وان ئامارا، محەمەد ئۆجالان ناڤەرۆکا جڤینێ ژ بۆ کۆمەک ئەندامێن مەدیایا پەکەکێ، کو کۆمەک سیاسەتمەدار ژی د ناڤ دە بوون، راڤە کر. ل گۆری داخویانیا محەمەد ئۆجالان، عەڤدللا ئۆجالان د ھەڤدیتنێ دە وھا گۆتیە: “مە ئەرکێ خوە بجیهئانیە؛ تشتەک دن تونە کو ئەم بکن. کوردێن ل رۆژئاڤا قەت نکارن چەکێن خوە دەینن. هەسەدە دکارە کۆمارا دەمۆکراتیکا سووریەیێ ل تەبقایێ راگهینە.” تێبینییێن محەمەد ئۆجالان یێن ل سەر داخویانیا سەرۆکێ پەکەکێ د ناڤ کوردان دە بوون سەدەما نیقاشەکا گرینگ. کوردان شیرۆڤە کرن، “گەر ئۆجالان ب ڤی رەنگی دفکرە، چما وی ئەڤ یەک راستەراست د ڤیدیۆ و نامەیا کو نڤیساندیە دە نەگۆت؟” ئەڤ شیرۆڤەیا گشتی پر راست بوو. لێ ژ ڤێ وێدەتر تشت ھەنە. دەولەتا ترک و مەدیایا پەکەکێ ب ھەڤ را ئۆپەراسیۆنەکا تێگھیشتنێ ل دژی کوردان دمەشینن. ئارمانج ئەوە کو ئۆجالان بێگونەھ و پاک نیشاندن.
عەڤدللا ئۆجالان نھا کارتەکە کو ل دژی چار پەرچەیێن کوردستانێ دهێت بکار ئانین.
داخویانیێن عەڤدللا ئۆجالان ژ شوباتێ ڤە د ناڤ کوردان دە بوونە سەدەما دوبەندیێن گرینگێن مەعنەوی. ب تایبەتی، دەردۆرێن کو 40 سالن د ئاستێن جوودا دە دلسۆزی لگەل پەکەکێ ھەبوون، ژ بەر داخویانیێن ئۆجالان پر دلتەنگ بوونە. کورد نھا پشتگری ددن دانینا چەکان و دبێژن، “ئۆجالان تەسلیم بوویە، رێیەک دن تونە، ب کێمانی دڤێت جوان نەمرن،” لێ ئەو د تێگھیشتنا خوە یا ل سەر ئۆجالان ب خوە دە شکەستنەک کوور دژین.
شکەستنا باندۆرا مەعنەوی یا ئۆجالان ل سەر کوردان ھەم ژ بۆ پەکەکێ و ھەم ژی ژ بۆ دەولەتا ترکیەیێ فشارەک مەزنە. ژ بەر کو ئۆجالان کارتەک ستراتەژیکە د دەستێ دەولەتا ترکیەیێ دە کو ل دژی کوردان تێ بکار ئانین. دەولەتێ کارتا ئۆجالان د ناڤبەرا سالێن 1970 و 1990 دە ل دژی گەلێ باکورێ کوردستانێ بکار ئانی.
د سالێن 1990 و 2010 دە، بکارئانینا کارتا ئۆجالان بەرفرەھ بوو و ئەو ل دژی باکور و ھەم ژی باشوورێ کوردستانێ ھاتە بکار ئانین.
ژ سالا 2010 ھەتا 2025، کارتا ئۆجالان د دەستێ دەولەتا ترک دە رۆلەکە گرینگتر لیست، و ڤێ جارێ، کارتا کو ل دژی باشوور و باکور ھات بکارئانین، ل دژی رۆژئاڤا دھێت بکارئانین. ئیرۆ رۆژئاڤا ل ڤێ لیستەیێ ھاتیە زێدەکرن. ئانگۆ، دەولەتا ترک کارتا ئۆجالان نە تەنێ د ناڤ سینۆرێن خوە دە، لێ د ھەمان دەمێ دە ل دژی کوردێن ل ھەر چار ئالیێن جیھانێ ژی ب کار تینە.
خەباتا PR (Publîc Relation) ژ بۆ عەڤدلا ئۆجالان
د سالا 1999 دە، ئۆجالان راگھاند و گۆت “ئەز بەلێندەرم. من بکار بینن و ئەز دێ ھەموو کوردان ئێخم خزمەتا دەولەتا ترک دە.” و نھا، دەم دەما جێبەجێکرنا ڤی ئەرکی یە. د رەوشا ھەیی یا ل رۆژھلاتا ناڤین دە، ئۆجالان ژ بۆ بجھانینا ڤان سۆزان دەرخستنە سەر دەپێ شانۆیێ. د سالا 1999 دە، ئۆجالان ل ئیمرالیێ گۆتبوو ئەفسەرێ ترک حەسەن ئاتیڵا ئوگوور “نھا، دەما کو ئەز ڤان گاڤان باڤێژم، ھندەک دێ ببێژنە من خایین. دڤێت ھوون رێگریێ ل ڤێ بکن.” دەولەت نها ڤێ ژ بۆ ئۆجالان دکە. ئۆجالان چارچۆڤەیا سیاسی یا کو ئەو بکار تینە چالاک کریە دا کو پشتراست بکە کو دەولەتا ترک ژ ئاژاوەیا رۆژھلاتا ناڤین ب سەرفرازی دەربکەڤە. کورد ب دەستێ ئۆجالان “ژ بۆ خەیالێن پەیمانا میساقا مللی و عۆسمانی یا نوو” تێن بکار ئانین. و ژ بۆ کو ئەڤ ئاپۆ سەرکەفتی بە، دڤێت ئەو ئیعتیبارا خوە بەرزە نەکە.
ھەم پەکەکە و ھەم ژی دەولەتا ترک ژ بۆ پاراستنا ئیعتیبارا ئۆجالان گاڤ ئاڤێتنە. خەباتەک PR (Publîc Relation) یا تەڤاھی ژ بۆ ئۆجالان دمەشە. گۆتنێن ئەرێنی یێن بەرێ یێن ئۆجالان ل سەر کوردان کری، ژ ئالیێ مەدیایا پەکەکێ ڤە رۆژانە تێن وەشاندن. ب ڤی ئاوایی ئەو ھەول ددن کو گۆتنێن ئۆجالان یێن بێرێز (کورد گلێشن-زبلن) دناڤا جڤاکا کورد بدن ژبیرکرن.
د نۆتێن ھەڤدینێ یێن 27ێ نیسانێ دە، ئۆجالان ھێزێن رۆژئاڤا وەکی “حەشدا شەعبی یا ئیسرایلێ” پێناسەکر. نھا، ئەو ھەول ددن کو گۆتنێن ئۆجالان بهێن ژ بیر کرن، و ئیدیعا دکن کو “ئۆجالان گۆتیە کو رۆژئاڤا دڤێت چەکێن خوە نەدانە.”
و تشتێ بالکێش ئەڤە کو محەمەد ئۆجالان ئەڤ داخویانیە د بن چاڤدێرییا دەولەتا ترک دە دایە. و رایەدارێن دەولەتێ ل دژی گۆتنێن ئۆجالان نەرازیبوونا خوە دییار ناکن. ژ بەر کو دەولەت دخوازە کو کورد باوەریا خوە ب ئۆجالان بینن و ھین ژی ژێ رە ببێژن “سەرۆک ئاپۆ.”
کوردێن د بن باندۆرا پەکەکێ دە ل سەر مەدیایا جڤاکی داخویانیێن محەمد ئۆجالان پارڤە دکن و ھەول ددن کو ئۆجالان جوان نیشان بدن. د راستیێ دە، ئەو ھەول ددن کو ئۆجالان پاک بکن ژ بەر کو ئەو ناخوازن وی مرۆڤێ کو ب سالان باوەرییا خوە پێ ئانینە وەکی “خایین” ب ناڤ بکن، ژ بەر ڤێ یەکێ ئەو ھەول ددن کو وی پیرووپاک بکن.
ئەڤە خەباتەکا PR یە. ب ڤێ پرۆژێ دخوازن ھێدی ھێدی کوردان ژەھری بکن.
لێ د داویێ دە، راستی خوەدی عادەتەکی یە کو رۆژەکی دێ هەر دیار بیت. ئەرکا ئۆجالان وەکی کارتەک د دەستێن دەولەتا ترک دە، و ئەرکا وی، نھا دەرکەتیە ھۆلێ.
