جەمیل بایک، لگەل کانالا ستێرک تیڤی یا پەکەکێ هەڤپەیڤینەک ئەنجامدا و داخوویانیەک بالکێش دا. بایک دا زانین، ئەو وەشاندنا ڤیدیۆیا رێبەرێ پەکەکێ عەبدوللاه ئۆجالان پشتی 26 سالان وەکە گاڤەکا “پر گرینگ” دبینن و تەکەز کر کو مەراسیما سەمبۆلیکا چەکدانینێ یا 11ێ تیرمەھێ ژی ل سەر بانگا ئۆجالان پێک ھاتیە.
بایک گرینگیا دامەزراندنا کۆمیسیۆنا ل مەجلیسێ دەستنیشان کر، لێ ھشیاری دا کو نابە کارێ وێ تەنێ ببە چەکدانینا پەکەکێ. ھەروھا گۆت، “یا گرینگ، ب یاسایێن دەمۆکراتیک نەھشتنا بنگەھا شەرێ چەکدارییە. ئەگەر ئەڤ بنگەھ رانەبە، پەکەکە چەکێن خوە دەینە ژی، دێ کۆمەکا دن چەکان ھلگرە.”
جەمیل بایک دەربارێ مژارا چەکدانینا پەکەکێ وەها ئاخڤی: “ئەگەر ترکیە د مەرجێن ئۆجالان دە گوھەرتنێ بکە، تەجریدێ راکە، ئۆجالان بکارە ب ئاوایەکە ئازاد کار بکە و لگەل ھەموو ئالیان بکەڤە ناڤا پێوەندیێ، و یاسایێن پێویست یێن دەمۆکراتیک بهێن دەرخستن، وێ دەمێ ئەم دکارین چەکێن خوە دەینین. ئەگەر نا، کەس نکارە ژ مە بخوازە کو ئەم چەکێن خوە دەینن.”
بەرپرسێن پەکەکێ داخوویانیێن کو ھەڤناگرن ددن. بایک ژ ئالیەکی بەحسا بریارا ئۆجالان دکە و ژ ئالیەکی دن دیتنێن خوە ل دژێ گۆتنێن کو ئۆجالان دبێژە ددە دیارکرن.
دەولەت باخچەلی دبێژە کو، مە چ بازاری ل گەل ئۆجالان نەکریە. دانوستاندنەک ھەیە د پرۆژەیا “ترکیا بێ تەرۆر”دە، پەکەکێ خوە هلوەشاند و مەراسیمەک سەمبۆلیک ژ بۆ دەست ژێبەردانا چەکان ئەنجامدا.
لێ بایک ژ بۆ چەکدانینێ بەحسا ھندەک مەرجان دکە. ھەروەھا یا بالکێش ئەوە کو، بەحسا تەجریدا ئۆجالان دکە. تەجریدا ئۆجالان وەک ھێجەتەکی تینە رۆژەڤێ. گەلۆ کەسەک د زیندانەکی دە د تەجریتێ دە بە، چەوە دکارە ئەوقاس چالاکیان بکە؟ ئەڤ گەلەکی بالکێشە. ئۆجالان ب خوە ناخوازە ژ ئیمرالی دەرکەڤە. ئۆجالان دترسە. لێ ھەرکەس دزانە و بایک ژ ھەرکەسی بێھتر دزانە چ تەجرید ل سەر ئۆجالان نینە.
بایک کەسەکی گرێدایێ ئیرانێ یە. ئەگەر داخوازا ئیرانێ نەبە بایک نکارە خوە بلڤینە. ئیران ژی ناخوازە پەکەکە خوە بێچەک بکە. پەکەکە سەناریۆیەکا ھاتیە چێکرن دلەیزە، واتە حەنەکێن خوە ل ڤی ملەتی دکە. بەرپرسێن ڤێ پارتیا نە کوردستانی ھەر رۆژ ب ئاوایەکی داخویانیا ددن.
ئەگەر وە پارتیا خوە هلوەشاندبە، ئەڤ تێ واتەیا کو، ھەرتشت هلوەشاندیە. دەولەتێ ناڤ ل پرۆژەیا خوە کریە و ھون ژی دێ ڤێ پرۆژەیێ جێبەجێ کن.
