چەتەیێن ب ناڤێ “جوانێن شۆرەشگەر” کو راستەراست فەرمانا ژ پەکەکێ وەردگرن د رەڤاندنا زارۆکان و چەکدارکرنا وان ل رۆژئاڤایێ کوردستانێ بەردەوامن و هەری داوی کەچەکا 13 سالی ژ کۆبانیێ رەڤاند.
چاڤکانیێن پێگەها دارکا مازی ئەشکەرە کرن، رێخستنا چەتەیان یا ب ناڤێ “جوانێن شۆرەشگەر” د داوییا مەها 6/2025ێ، ل باژارێ کۆبانیێ، کەچەکە دن یا 13 سالی کو ژ شێنیێن کۆبانێ ب خوە یە رەڤاند و ئەو بەر ب کامپەکە لەشکەرکرنا زارۆکان ڤە برییە.
چاڤکانیێن دارکا مازی تەکەز کرن، ناڤێ کەچا هاتیە رەڤاندن عەدلە محەمەد عیسا یە و ناڤێ داییکا وێ ژی نارینە.
ل گۆر ئاگاهییان، پشتی کو ڤان چەتەیان ئەڤ کەچا 13 سالی رەڤاندی، ئەو بەر ب کامپا لەشکری یا خوە یا ل سینۆرێ گوندێ ملیحێ ل باشوورێ سرینێ یا سەر ب باژارۆکێ کۆبانێ ڤە بریە ژ بۆی کو وێ کەچێ تەڤلی پەروەردەیا لەشکەری و ئایدۆلۆژی بکن.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان ب داوی نەبوویە.
