هێزێن سووریەیا دەمۆکراتیک (هه‌سه‌ده) تەکەز دکە، د رەوشا ئالۆزا نها دە رادەستکرنا چەکێن خوە “مەسەلەیەکەنە پێکانە” و شەرتێ خوەیێ سەرەکە ژ بۆ تەڤلیبوونا د ناڤ ئارتێشا سووریەیێ دە دوبارە کر.
بەردەڤکێ فەرمی یێ ههسهدێ ئەبجەر داووود دوهـ 22ێ تیرمەهێ د داخویانیەکێ دە گۆت: “ل گەل ئالۆزیێن بەردەوام ل سووریەیێ، زێدەبوونا توندووتووژیێ و گەفێن رێخستنا داعشێ، نە پێکانە کو هێزێن مە چەکێن خوە رادەست بکن.”
داووود هەر وها دا زانین، هه‌سه‌ده دکارە ب شەرتەکی تەڤلی ئارتێشا سووریەیێ ببە و گۆت: “هه‌سه‌ده دکارە ب رێیا پەیمانەکە دەستووری کو تایبەتمەندیا پێکهاتەیا کورد ناس بکە، تەڤلی ئارتێشا سووریەیێ ببە.”
بەردەڤکێ ههسهدێ دەستنیشان کر، “هه‌سه‌ده نە ئالیگرێ شەرە، لێ ئەوێ ل هەر دەرا کو لێ بە، پاراستنا گەلێ خوە بکە”.
سالح موسلم: ئەگەر گارانتی هەبن، ئەم ب چەکان ڤە گرێدایی نامینن
ژ ئالیێ خوە ڤە، ئەندامێ دەستەیا سەرۆکاتیێ یا پارتیا یەکیتیا دەمۆکراتیک (په‌یه‌دێ) سالح موسلم ژی هەمان هەلوەست پشتراست کر و ژ “سكای نیوز عەرەبی” رە ئاخڤی.
موسلم گۆت: “ئەگەر باوەری و گارانتیێن دەستووری هەبن، ئەمێ ب چەکان ڤە گرێدایی نەمینن.”
سالح موسلم هەروه‌ها رەخنە ل حکوومەتا سووریەیێ گرت و ئاماژە پێ کر کو “حکوومەتا سووریەیێ د جیبجیکرنا پەیمانێ دە گران تەڤدگەرە.”
پەیمانا ئەحمەد شەرع و مەزلووم عەبدی
رۆژا 10ێ ئادارا بۆری، فەرماندارێ گشتی یێ ههسهدێ مەزلووم عەبدی و سەرۆکێ قۆناغا ڤەگوهێزا سووریەیێ ئەحمەد شەرع، پەیمانەک ژ 8 خالان پێک دهات ئیمزە کربوون. د وێ پەیمانێ دە تەکەزی ل سەر یەکپارچەییا ئاخا سووریەیێ، تەڤلیبوونا هێزێن ههسهدێ د ناڤ سازیێن دەولەتێ دە و ئاگربەستێ هاتبوو کرن.
