کەچەکە دن یا ئێزدی هات رزگارکرن

کەچەکە دن یا ئێزدی، کو پشتی داگیرکرنا شنگالێ و پارێزگەها نەینه‌وایێ ژ ئالیێ چەکدارێن داعشێ ڤە هاتبوو رەڤاندن، پشتی دەربازبوونا 11 سالان هات رزگارکرن.

ل گۆری ئاگاهیێن كوردستان 24ێ، ئەو کەچ، کو ناڤێ وێ رێهام حەجی حەمێ یە و ژیێ وێ 20 سالە، ژ ئالیێ هێزێن سووریەیا دەمۆکراتیک (هه‌سه‌دێ) ڤە ل کامپا هۆلێ هاتیە دیتن و رزگار کرن.

دەما کو رێهام ژ ئالیێ چەکدارێن داعشێ ڤە هاتبوو رەڤاندن، ژیێ وێ تەنێ نەهـ سال بوون. خووشکەک و پێنج برایێن وێ ژی دگەل 30 کەسێن دن ژ کەسوکارێن وێ یێن نێزیک، کو ئەو ژی ژ هێلا داعشێ ڤە هاتبوون رەڤاندن، هین ژی وندانە.

دایک و باڤێن رێهامێ، کو ل کامپا ئیسیایێ یا کۆمەلگەها شێخانێ دژین، نها چوونە رۆژئاڤایێ کوردستانێ دا کو کەچا خوە ڤەگەرینن هەرێما کوردستانێ.

ئەڤ کەچ ل سالا 2014ێ، د دەما ئێریشا چەکدارێن داعشێ ل سەر خانەسۆرێ دە، ب 77 ئەندامێن مالباتا خوە و کەسووکارێن خوە رە ژ هێلا چەکدارێن داعشێ ڤە هاتیە رەڤاندن، لێ پشتی 11 سالان زێدەتری 30 ژ وان هین ژی وندانە.