د بوویەرەکە دن یا رەڤاندنا زارۆکان دە چەتەیێن پەکەکێ “جوانێن شۆرەشگەر”، کەچەکە 17 سالی ل ناڤەندا کۆبانێ رەڤاند.
رەڤاندنا زارۆکێن تەمەن بچووک ژ ئالیێ چەتەیێن ب ناڤێ “جوانێن شۆرەشگەر”ڤە کو راستەراست فەرمانا ژ پەکەکێ وەردگرن بەردەوام دکە و هەری داوی ژی کەچەکە دن یا بچووک یا ب ناڤێ مریانا عۆمەر والی، کو ژداییکبوویا 25ی تیرمەها 2008ێ یە، دەما کو بەشداری پیرۆزباهییا 19ێ تیرمەهێ ل مەیدانا شەهید عەقید ل ناڤەندا کۆبانیێ بووی، رەڤاندیە.
ل گۆر ئاگاهیان، بابێ ڤێ کەچکێ د تۆمارەکا ڤیدیۆیی دە هوورگلیێن رەڤاندنا کەچا خوە ژ ئالیێ “جوانێن شۆرەشگەر” ڤە ددە دیار کرن و دبێژە، پشتی ب داوی هاتنا مەراسیما پیرۆزباهیێ کەچا من ڤەنەگەری مالێ، و ئێماژە ب ڤێ یەکێ ددە کو کەچا وی ژ ئالیێ “جوانێن شۆرەشگەر” ڤە بەر ب کامپەکا چەکدارکرنا زارۆکان ڤە هاتیە برن.
ئەڤ بوویەر د دەمەکێ دە تێ کو لەشکەرکرنا زارۆکێن تەمەن بچووک ل دەڤەرێن د بن دەستهلاتا رێڤەبەریا خوەسەر دە هەر کو دچە زێدە دبە، تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان ب داوی نەبوویە.
مالباتا مریانایێ ژ چارەنووسا کەچا خوە دترسە،لۆما د ڤیدیۆیێ دە، باڤێ وێ بانگ ل رێخستنێن ناڤنەتەوەی و ئالیێن پەیوەندیدار دکە کو ب لەز موداخەلە بکن دا کو کەچا وی سەربەست وەرە بەردان و گارانتی بکن کو ئەو راستی ئیستسمار یان پەروەردەھیا لەشکەری یا ب زۆرێ نایێ.
رێخستنێن مافێن مرۆڤان پشتراست دکن کو بەردەوامیا ڤان بنپێکرنێن ل دژی زارۆکان بنپێکرنەک ئەشکەرە یا پەیمانێن ناڤنەتەوەیی یە، و بانگ ل رێڤەبەریا ھەسەدێ دکن کو تەدبیرێن پێویست وەربگرە دا کو رەڤاندنا زارۆکان راوەستینە و ژ بەرپرسیاران حەساب بپرسە.
