ژ ئیمرالیێ کەسەکی کو کادرۆیێ پەکەکێ بوو ھات بەردان. وەیسی ئاکتاشێ کو بەردانا وی سالەک و 3 مەھان ھاتبوو پاشخستن، پشتی 31 سالان ھات بەردان. ئاکتاش 10 سال بوون ل گرتیگەھا ئیمرالیێ گرتی بوو. و ب ڤی ئاوایی بۆ جارا یەکێ کەسەکی ل گەل عەبدوللاھ ئۆجالان ھات بەردان. گەلەک دەردۆرێن سیاسی ئەڤ یەک وەکو گاڤەکا گرینگ بناڤ دکن و دبێژن کو بلا ئەڤ کارە بەردەوام بە.
وەیسی ئاکتاشێ ل گرتیگەھا ئەولەکاریا بلند یا تیپا F یا ئیمرالیێ هوتبوو زیندانکرن، پشتی 31 سال و 3 مەھان ھاتە بەردان. 28ی نیسانا 2024ێ ژ ھێلا یاسایی ڤە سزایێ 30 سالان کو ژ بۆ وەیسی ئاکتاش ھاتبوو دەرکرن، تەمام ببوو، لێ ب بریارا لیژنەیا ئیدارە و چاڤدێریا گرتیگەھان بەردانا ئاکتاش ژ بۆ سالەکێ ھاتە پاشخستن. لێبەلێ ئەو ئیرۆ، 26ی تیرمەھێ ھات بەردان.
وەیسی ئاکتاش کییە؟
وەیسی ئاکتاش کادرۆیەکی پەکەکێ یە و 31 سال بوون گرتی بوو. ئەو ئیرۆ سەربەست ھات بەردان.
وەیسی ئاکتاش سالا 1971ێ ل ئامەدێ ژ دایک بوویە. ئەو سالا 1990ێ تەڤلی پەکەکێ بوو. د سالا 1992یێ دە ژ بۆی خەباتا باژاران ھات رێکرن. د سالا 1993یێ دە ھات گرتن. د سالا 1994ێ دە ھات دادگەهکرن و سزایێ ھەتا ھەتا بۆ وی ھات دەرکرن.
ئەو د گەلەک گرتیگەھێن جور بە جور دا ما. وەیسی ئاکتاش، د سالا 2015ێ دە ژ بۆ ئەرکا سکێرتەریا ژ بۆ عەبدوللاھ ئۆجالان لگەل ھەژمارەک گرتیێن دن یێن ژ دۆزا پەکەکێ ژ بۆ گرتیگەھا ئیمرالیێ ھاتبوو ڤەگوھاستن و ژ وێ دەمێ ڤە ل گرتیگەھا ئیمرالیێ بوو.
ب ڤی ئاوایی جارا یەکێ کەسەکی ژ ئیمرالیێ ھات بەردان.
نھا ب تەنێ 5 کەسێن دن ب ناڤێن، عۆمەر خەیری کۆنار، زەکی بایھان، محەمەد یامالاک، ئەنگین ئاتابەی، حاملی یلدرم ل ئیمرالیێ مانە.
