رەوانگەھا سووری یا مافێن مرۆڤان ئامارێن بنپێکاریان پشتی رەڤینا سەرۆکێ بەرێ یێ سووریەیێ بەشار ئەسەد ئەشکەرە کر و راگھاند، د ھەیاما نێزیکی 8 مەھان دە، 3269 بوویەرێن “کوشتنا مەیدانی” ل سەرانسەری سووریەیێ بەلگە کرنە، کو پرانیا وان ب سەدەمێن تایفی و ھەرێمی ھاتنە کرن.
رەوانگەھێ د راپۆرتەکا بەرفرەھ دە دا زانین، ژ 8ێ بەرچلەیا 2024ێ ھەتا 26ێ تیرمەھا ئیسال، ل سووریەیێ ب ھەزاران سڤیل، د ناڤ دە ژن و زارۆک، بوونە قوربانیێن ئێریشێن پلانکری یان ژی ئۆپەراسیۆنێن کوشتنا راستەراست. ل گۆری رەوانگەھێ، ئەڤ تاوان ژ ئالیێ ھێزێن سەر ب وەزارەتێن بەرەڤانی و ناڤخوەیی، کۆمێن چەکدارێن ب پشتگریا دەستھلاتێ، و ھەروھا کۆمێن عەشیری یێن چەکدار ڤە ھاتنە کرن.
ھەرێمێن سووەیدا و ھەرێمێن بەراڤێ وەکی دو قادێن ھەری زێدە کو توندیا تایفی لێ روو دایە، ھاتن دەستنیشانکرن. تەنێ ل ڤان ھەر دو ھەرێمان 2610 سڤیل، د ناڤ دە ژن و زارۆک، بوونە قوربانیێن کوشتنێن تایفی.
راپۆرتێ ب تایبەتی بال کشاند سەر کۆمکوژیا سووەیدایێ کو تەنێ د مەھا تیرمەھێ دە بوویە سەدەما کوشتنا 928 کەسان، کو ژ وان 250 کەس ب ئاوایێ “سیدارەدانا مەیدانی” ھاتنە کوشتن.
ئاماژە ب وێ یەکێ ژی کر، دەستھلاتا نھا یا سووریەیێ ھەول ددە خوە ژ ڤان تاوانان نە بەرپرسیار نیشان بدە و ب رێیا دەزگەھێن خوەیێن مەدیایی راستیان ڤەدشێرە و قوربانیان وەکی “سیخور” یان “فتنەکار” ب ناڤ دکە.
د بەشەکە دن یا راپۆرتێ دە، رەوانگەھا سووری رەخنە ل “لژنەیا لێکۆلینا راستیان” گرت و دیار کر کو لژنە د پرسیارکرنا بەرپرسێن راستیەقینە یێن کۆمکوژیان دە تێک چوویە و تەنێ بنپێکاری تۆمار کرنە بێی کو بکەڤە کووراھیا بریاردانێ. ھەروھا، لژنەیێ شاھدیێن قوربانیان، ب تایبەتی ل گوندەوارێ تەرتووس و لازقیێ، پاشگوھ کرنە.
رەوانگەھێ تەکەز کر، ل جەم وان بەلگەیێن ب دەنگ و وێنە ھەنە کو تەکەز دکن کو ئەڤ “کوشتن” نە راستھاتنی بوون، لێ ب ئارمانجێن تایفی یێن ئەشکەرە ھاتنە کرن و د دەما وان دە سلۆگانێن دژمنانە ھاتنە بکارئانین.
ب گشتی، ژ دەما کۆمکوژیێن ل ھەرێمێن بەراڤێ د ئادارا بۆری دە ھەتا نھا، رەوانگەھا سووری کوشتنا 3209 وەلاتیان بەلگە کریە، کو 93 ژ وان ژن و 44 ژی زارۆکن.
