کادرۆیەکا ژن یا پەکەکێ ل سلێمانیێ نەرازیبوونا خوە یا ل ھەمبەر بەرھەڤکرنا ئالیکاریان ل سەر ناڤێ گەلێ غەزەیێ نیشان دا و راگەھاند، کو ھندەک ئالی وەک بخوە دبێژە: “جەحشێن ئیخوانی ب ناڤێ ئالیکاریا غەزەیێ پارە و داھاتێ کوردان ددزن.”
کادرۆیا پەکەکێ ل سلێمانیێ ستارە عارف، ل سەر رووپەلا خوە یا فایسبۆکێ گۆت: “عەرەب ب خوە بیست و دو دەولەتێن وان ھەنە و ب ھەڤ را ئالیکاریا ھەڤ ناکن و ناچن غەزەیێ. ئەو یەک زمان و یەک نەتەون، لێ ئیخوان و ئۆلدارێن ئیسلاما سیاسی (سەلەفی)یێن جەحش و کرێگرتیێن قەتەر، ترک و عەرەب بێ گوھ بدن ڤێ رەوشا ئابۆری یا گران یا خەلکێ کوردستانێ تێدەیە و ئەوقاس ھەژار و فەقیر و بێپارە و بێدەباریا ژیانێ یا خەلکێ مە، ئەو پارە و داھات گەلێ کورد د بن ناڤێ ئالیکاریا ژ بۆ غەزەیێ دە ددزن و قاشۆ ئالیکاریا عەرەبێن فلیستین و غەزەیێ دکن. لێ ب پشتراستی ئەو وێ یەکێ ژ بۆ بەریکا خوە دکن، نە ژ بۆ غەزەیێ.”
ھەروەھا دبێژە: “پەرە و ئالیکاریا کو ئەو ب ناڤێ غەزەیێ ژ کوردان ددزن، چما ژ بۆ ئالیکاریا چینێن ھەژار و خەلکێ بەلەنگازێن سلێمانیێ، هەولێر، حەلەبچە و کوردێن باشوورێ کوردستانێ بە گەلەک خێرتر و ب روومەتترە ژ بۆ کرێگرتیێن دژمنان.”
ستارە عارف دبێژە: “کەنگی ئەرکێ وەیە کو ھوون ب ناڤێ کوردان ئالیکاریا وان فلیستینیان بکن کو د ئێریشێن کیمیەوی و ئەنفالا ل دژی کوردێن باشوورێ کوردستانێ ل پشت سەدام حوسێنێ دیکتاتۆر و جەلادێ کوردان رادوەستان و دژی کوردێن باشوورێ کوردستانێ بوون. فلیستین ب خەلک و دەستھلات ڤە ھەموو ل گەل دەولەتێن عەرەبی و ئیسلامی ئالیکاریا مادی و مەعنەوی ددان سەدان حوسێن و ھێزا لەشکەری، چەک و پارە ژ بۆ وی دشاندن کو کورد پێ دھاتن جینۆساید کرن.”
داویێ دە ژی دبێژە: “بلا جەحشبوون و بیانیپەرەستییا ب پلانێن دژمنێن کورد و ل دژی کوردان بەس بە. دڤێت گەلێ کورد رێ نەدە وان دژبەر و دژمنێن کورد و وان راوەستینن.”
ھێژایی گۆتنێیە ھەتا نھا ت یەک ژ پارتیێن ئیسلامی یێن کو ژ گەلێ کورد پەرەیان وەردگرن و دبێژن ئەو دێ بشینن غەزەیێ، ب فەرمی بەرسڤ نەدانە ڤان ئیدیعایان.
