سەرۆکێ گشتی یێ پارتیا وەلاتپارێزێن کوردستانێ (PWK) موستافا ئۆزچەلیک، د سەمینەرەکێ دە ل سویسرەیێ، بانگا ئاڤاکرنا “پارتیەکا سیوانی، گرسەیی و ھەڤبەش یا ملی” ل باکورێ کوردستانێ کر. ئۆزچەلیک پێڤاژۆیا ھەیی یا د ناڤبەرا دەولەتا ترک و ئۆجالان دە ژی ب توندی رەخنە کر و گۆت، “ئەم نە شریکێ ڤان گۆتووبێژێن ڤەشارتی و نەشەفافن.”
د سەمینەرا کو رۆژا یەکشەمبێ، 27/7/2025ێ، ل باژارێ باسەلێ یێ سویسرەیێ ھات لدارخستن دە، سەرۆکێ گشتی یێ PWK موستافا ئۆزچەلیک، ب تایبەتی بانگ ل پارتی، کۆم و کەسایەتێن نەتەوەیی یێن ل دەرڤەیی دەم پارتی و ھوداپارێ کر کو ژ بۆ یەکتیێ گاڤان باڤێژن.
ئۆزچەلیک د بانگا خوەیا سەرەکە دە گۆت: “وەرن ئەم ژ بۆ پارتییەکا سیوانی، جەماوەری، ھەڤبەش یا ملی، دەمۆکرات دەست بدن ھەڤ.” وی ئانی زمان کو ئاڤاکرنا پارتیەکا وەھا یا کو بکاربە بەشداری ھلبژارتنان ببە، دکارە ژ گەلێ کورد رە ببە “ھێڤی و ئالتەرناتیفەکا خورت.”
“چارەسەری ب پەرسپەکتیفا نەتەوا دەمۆکراتیک نابە”
سەرۆکێ PWK پێڤاژۆیا کو نھا ب ناڤێ “چارەسەری” تێ برێڤەبرن رەخنە کر و ھەلوەستا پارتیا خوە وھا ئانی زمان: “ئەم پشتگرییا چەکدانینا پەکەکێ دکن؛ لێ بەلێ ئەم نە ل گەل وان فکر و ھەلوەستێن ئۆجالان، پەکەکێ و دەم پارتییێ نە کو مافێن نەتەوەیی، کۆلەکتیف و مافێ ستاتویەکا سیاسی تونە دحەسبینن. پرسا کوردستانێ ب ھەموەلاتیبوونا وەکھەڤ و پەرسپەکتیفا نەتەوا دەمۆکراتیک نایێ چارەسەرکرن. پرسا کوردستانێ پرسا خوەیدارەکرنا گەلێ کوردستانێیە، پرسا مافێ چارەنووسا ملەتێ کوردە.”
ئۆزچەلیک ھەروھا دیار کر، نابە چارەنڤیسا 30 ملیۆن کوردێن باکور ل پشت دەریێن گرتی و ب ئاوایەکی نەزەلال د ناڤبەرا ئۆجالان، دەولەتا ترک، پەکەکێ و دەم پارتیێ دە بهێت دیارکرن.
پێشمەرجێن چارەسەریێ
ل گۆری ئۆزچەلیک، ژ بۆ کو رێ ل بەر چارەسەریەکە راستین ڤەبە، دڤێت بەری ھەر تشتی “ھەبوونا ملەتێ کورد، مافێ پەروەردەیا ب زمانێ کوردی، فەرمیبوونا زمانێ کوردی، ئازادیا رامان و رێخستنێ د قانوونا بنگەھین دە بێنە گارانتیکرن و ھەموو گرتیێن سیاسی بێن ئازادکرن.”
دەربارێ پەرچەیێن دن یێن کوردستانێ دە ژی ئۆزچەلیک پشتگریا خوە ژ بۆ بریارێن کۆنفەرانسا قامشلۆیێ ئانی زمان، بانگا ئاڤاکرنا حکوومەتەکە ھەڤبەش ل باشوورێ کوردستانێ کر و گرینگیا ھەڤکاریەکا نەتەوەیی ل رۆژھلاتێ کوردستانێ دەستنیشان کر.
سەمینەرا ئۆزچەلیک ب مۆدەراتۆریا جیگرێ سەرۆکێ گشتی یێ PWK رفعەت سەفالی ھات برێڤەبرن و نوونەرێن پەدەکێ، پەسەکێ، پەدەکە-باکور، کەکەپە و گەلەک سیاسەتمەدار و رەوشەنبیرێن کوردێن ل باسەلێ بەشداری جڤینێ بوون.
