بووبێ ئەسەر
ئەنفالێ جارا ئەول ل دەڤەرا بارزان و ژ بارزانیان رۆژا 31/7/2025ێ دەستپێ کر. پشتی وێ د حەفت قۆناغاندا ب کوشتن و بناخکرنا 182.000 کوردان کو 8000 زلامێن بارزانیان بوو، داوی لێ ئانین.
ل گۆر من؛ ئەنفال بەشەک ئانگۆ پەرچەیەک ژ جینۆسایدێیە. چما؟ ژ بەر کو جینۆساید قرکرنا گەلەکی، وێرانکرنا ملەتی یە. لێ ئەنفال چیە؟ ئەو ژی تونەکرنا گەلێ کورد، راکرن ئانگۆ کوشتن و بناخکرنا وی ب خوە و تایبەتی یا بارزانیان بوو.
ما ئەڤ نە جینۆسایدە لێ چیە؟
دڤێت کورد رۆژێن خوە یێن قرکرن و وێرانیا ھاتیە سەرێ وان ژ بیر نەکن. ئەڤ وێرانی و قرکرن ل ھەرچار پەرچێن کوردستانێ بێ وەستان دۆماندیە و نھا ژی ژ بلی باشوورێ کوردستانێ ل پەرچێن دن دۆمدارە.
ھەتا کو کورد نەبن خوەدی دەولەتەکا خوە یا سەربخوە، دێ کۆمکووژی، وێرانی و جینۆسایدکرنا کوردان ھەر بەردەوام بە. ژ بۆنا پێشیلێگرتنا ڤێ ژی، دڤێت ھەمی کورد ژ بۆ باشوورێ کوردستانێ ببن ئالیکار دا کو ور بگهیت سەرخوەبوونا خوە. ب گۆتنا سەرۆک بارزانی: “گوندەکی ئازادکری و سەربخوە ژ وەلاتەکی داگیرکری باشترە.”
ژ بۆنا ئێدی کورد نەبن قوربانا لۆزانەکا نوو، ژ بۆنا نەدیتنا کارەساتێن وەکە سەرھلدانا ئاگری، کۆچگری، زیلان و تەڤگەرا شێخ سەعیدێ نەمر، حەلەبچە، ئەنفال، کۆمکوژی و وێرانیێن نوو، دڤێت کورد ببن دەولەت. ئەڤ شانسا کوردان ژی نھا تەنھا ل باشوورێ کوردستانێ ھەیە. لۆما ل سەر ھەر کوردەکی ژ وەلاتێ خوە حەز دکە فەرزە کو ئالیکاری و پشتگریا باشوورێ کوردستانێ بکن.
دڤێت ملەتێ کورد ڤێ ژ بیر نەکن کو ھەتا ئەم نەبن دەولەت، ئەم نە خوەدیێ خوە و چ تشتەکی نە. ژ بەر کو دەولەت خوەدیتیێ ل ملەتێ خوە، ل گەلێ خوە و ل کەسایەتیێن خوە دکە. دڤێت کورد بزانبن کو بێ دەولەتێ مرنە. کۆمکوژیە، ئەنفال و حەلەبچەیە…
زێدەیی سەد سالانە کو پەیمانا لۆزانێ پێک ھاتبوو. لێ ھێژ ژی کورد ل سەر لنگێن خوە نە. ب پەیمانەکا وەکە لۆزانا دودان ئێدی کورد نامینن. ژ بۆنا کورد وەکە کورد ل سەر ئاخا خوە و وەکە کورد بمینن دڤێت ببن دەولەت.
نھا دەولەتبوونا کوردان ب سایا بەرخوەدان و تەڤگەرا بارزانیان یا زێدەیی سەد سالان، ل بەر دەریێ ھەر مالەکا کوردە. ژ بۆنا کو ئەو شانس، ئەو ھەبوون و ھێژایی ژ بەر دەریێ مە نەچە، دڤێت ئەم دەریێن خوە ڤەکن و وێ ھەمبێز بکن.
دڤێت ھەمی کورد د ڤان رۆژێن تاری و تەنگ دە ژ بۆ سەرۆک مەسعوود بارزانی ببن پالپشت دا کو ئەو ژی بکاربە کارێ سەرخوەبوونا کوردستانێ لگەل دەولەتێن مەزن گوفتۆگۆ ئانگۆ موناقەشە بکە. سەرۆک ب رەنگێ خوە، ب دەنگێ خوە، ب وێرەکی، فکر و رامانێن خوە دکارە سەرۆکاتیا ملەتێ خوە بکە. ئەو ئیرۆ ژ بۆنا مە ھەمی کوردان سەرۆک بارزانییە…
