رێڤەبەریا دژەتەرۆرا کوردستانێ راگهاند، درۆنەکە بۆمبەبارکری ل نێزی گوندێ دووگردکانێ سەر ب ناڤچەیا مەخموورێ کەتیە خوارێ، لێ نەتەقیایە.
دژەتەرۆرا کوردستانێ د داخویانیەکێ دە دیار کر: “ئیرۆ ساعەت 09:30ێ سبەهێ، درۆنەکە بۆمبەبارکری ل نێزی گوندێ دووگردکانێ ناڤچەیا مەخموورێ یا سەر ب پارێزگەها هەولێرێ ڤە کەتە خوارێ و نەتەقی.”
ئەڤ بوویەر تەنێ دو رۆژ پشتی کەتنا درۆنەکە دن یا بۆمبەبارکری ل هەرێما کوردستانێ پێک تێ، کو ل ناحیا رزگاری یا سەر ب ناڤچەیا خەباتێ یا پارێزگەها هەولێرێ کەتبوو خوارێ. وێ دەمێ ژی دژەتەرۆرا کوردستانێ راگهاندبوو کو ژ بەر بوویەرێ ت زیانەکە جانی چێنەبوویە.
ژ دەستپێکا مەها تیرمەهێ ڤە هەتا نها، ب گشتی زێدەتر ژ 20 ئێریشێن ب درۆن و مووشەکان ل دژی باژارێن هەرێما کوردستانێ هاتنە کرن. ژ ڤان ئێریشان، 9 ئێریش ل سەر زەڤیێن پەترۆلێ بوونە، وەک زەڤیێن خورمەلە، کۆرمۆر، سەرسنک، ئەتروش، بای حەسەن، پێشخابوور، تاوکێ و هونت ئۆیل. ئێریشێن دن ژی ل سەر هێزێن ئەولەهیێ و فرۆکەخانەیان هاتنە کرن.
د هەمان چارچۆڤەیێ دە، شاندەکە پایەبلندا ئیراقێ ب سەرۆکاتیا شێورمەندێ ئاسایشا نشتمانی قاسم ئه‌عره‌جی رۆژا 28ێ تیرمەهێ سەردانا هەولێرێ کربوو و ژ ئالیێ وەزیرێ ناڤخوەیێ حکوومەتا هەرێما کوردستانێ رێبەر ئەحمەد ڤە هاتبوو پێشوازیکرن.
د کۆنفەرانسەکە رۆژنامەڤانی یا هەڤبەش دە، قاسم ئه‌عره‌جی ئێریش شەرمەزار کرن و گۆت: “ئێریشێن ب درۆنان یێن ل سەر هەرێما کوردستانێ زیانێ دگهینن ناڤودەنگ و ئابۆریا ئیراقێ. ئەم ڤان ئێریشان شەرمەزار دکن و ئێریشکار دێ بگهیژن جەزایێ خوە.”
