پارتیا وەلاتپارێزێن کوردستانێ (PWK)، ب بۆنەیا 42 مین سالڤەگەرا جینۆسایدا بارزانیان داخویانیەک بەلاڤ کر و تێ دە بانگ ل ئالیێن سیاسی یێن باشوورێ کوردستانێ کر کو ژ بۆ پاراستنا دەستکەفتیان، تفاقەکە نەتەوەیی پێک بینن و حکوومەتەکە هەڤبەش ئاڤا بکن.
بورۆیا راگەهاندنێ یا پارتیا وه‌لاتپارێزێن كوردستانێ ب هەلکەفتا 31ێ تیرمەهێ، سالڤەگەرا 42 مین یا ئەنفالکرنا بارزانیان، داخویانیەکە نڤیسکی وەشاند و تێ دە 8000 شەهیدێن بارزانی ببیر ئانین.
د داخویانیێ دە، هۆڤیتیا تاوانێ هات ببیرخستن و هات گۆتن، د 31ێ تیرمەها 1983ان دە، رەژیما سەدام 8 هەزار مێرێن بارزانی، کو تەمەنێ وان ژ 7 هەتا 85 سالی بوو، ژ هەرێما بارزانێ رەڤاندن و ل کامپێن قوودوس و قادسیێ یێن ل قووشتەپەیێ حەپس کرن.
دەستنیشان کر، ئەو کەس پشتی ئێشکەنجەیەکە مەزن هاتن ونداکرن و تەڤی دەرباسبوونا 42 سالان ژی، چارەنڤیسا پرانیا وان هینا ژی نەدیارە.
“دڤێ هەموو کورد ل دەستکەفتیان خوەدی دەرکەڤن”
د داخویانیێ دە، هەموو کەسێن بەرپرسیارێن ئەنفالێ هاتن روورەشکرن و بانگا یەکیتیێ هات کرن.
پارتیا وه‌لاتپارێزێن كوردستانێ تەکەز کر، بەرسڤا هەری مەزن و ب باندۆرا ل دژی جینۆسایدێ، ئاڤاکرنا حکوومەتەکە هەڤبەش و پێکانینا تفاقەکە نەتەوەیی و نشتمانییە ل باشوورێ کوردستانێ.
هەروها د داویا داخویانیێ دە بانگ ل هەموو کوردێن جیهانێ هات کرن و هات گۆتن: “دڤێ هەموو کوردێن جیهانێ ل دەستکەفتیێن فەدەرالێن هەرێما کوردستانێ خوەدی دەرکەڤن، بپارێزن و پێشدە ببن.”
