نەتەوەیا کورد ب حەسرەتا پێکانینا یەکیتییا کوردان دسۆژە. لێبەلێ، یەکیتییا نەتەوەیی ب خوەستەکێن ھەستیاری پێک نایێ. گەر دەما راست، ئارمانجێن راست و مرۆڤێن راست ب ئاوایەکی راست وەرن جەم ھەڤ، یەکیتییا نەتەوەیی دکارە ژ بۆ گەل ئازادییێ بینە. وەکی دن، ھەکە ھوون ھەول بدن کو یەکیتییا نەتەوەیی لگەل مرۆڤێن خەلەت و یێن خوەدی ئەجیندایێن ڤەشارتی ئاڤا بکن، ئەو یەکیتی خزمەتا یەکیتی و ئازادیا نەتەوەیا کورد ناکە. ژ بۆ بدەستخستنا ڤێ یەکێ، دڤێت ئەم نە ل سەر ھەستان بەلکو ل سەر راستیێن دیرۆکی و ل سەر راستیێن ئیرۆیین تەڤبگەرین.
بانگا عەڤدللا ئۆجالان یا داویێ ژ بۆ “کۆنگرەیا نەتەوەیی” و پێشنییارکرنا “سەرۆک بارزانی” ژ بۆ سەرۆکاتیا کۆنگرەیێ دڤێت د ڤێ چارچۆڤێ دە بهێت نرخاندن. بانگا ئۆجالان یا سەمیمییە، یان ژی لیستکەک دن د ناڤ لیستکێ دەیە، یان ژی د بن ناڤێ کۆنگرەیا نەتەوەیی دە ژ پشت ڤە خەنجەر لێدانە…؟
پشتی سالێن 1980، پەکەکێ، باندۆر و ھێزا پەدەکێ ل سەر نەتەوەیا کورد ناس کر و دیت، لۆما ژی بانگا بەرەیێ نەتەوەیی کر.
و جارا یەکەم د سالا 1983 دە، پرۆتۆکۆلەکا 9 خالی د ناڤبەرا پەدەکێ و پەکەکێ دە ھاتە ئیمزەکرن. ب خێرا وێ پرۆتۆکۆلێ، پەکەکە ھات باشوورێ کوردستانێ و ژ ھەموو دەرفەتێن پەدەکێ و پێشمەرگەیان سوود وەرگرت. لێبەلێ، پەکەکێ ب دزی ڤە لگەل سەدام ھەڤپەیمانیەک دژی-پەدەکێ پێشخست. سالا 1985 ل حەفتەنینێ ئێریشی پارتیا کۆمونیستا کوردستانێ کر و پێشمەرگە شەھید کرن. د ناڤبەرا پارتیێن کوردی یێن ل ھەرێما بەھدینانێ، د ناڤبەرا عەشیر و پارتیان دە تۆڤێ نەیارتییێ چاند. واتە پابەندی پرۆتۆکۆلێ نەبوو.
ژ وێ دەمێ و پێ ڤە، ھەر گاڤا کو پەکەکێ بەحسا یەکیتیا نەتەوەیی کری، وەک سالێن 80یێ ژ پشتڤە خەنچەر ل هەموو رێخستنێن کوردان دا.
ھەر گاڤا کو ژ بۆ کوردان دەرفەتێن تێکۆشینێ دەردکەت ھۆلێ، پەکەکە ژی نشکا دەردکەت ھۆلێ، ب گۆتنا “یەکیتیا نەتەوەیی” ھەستێن گەل ئیستیسمار دکر، ھەمی رایا گشتی مژوول دکر و ب ھەڤکاریا ھێزێن بییانی ئاژاندایا خوە یا ڤەشارتی پێک دئانی.
بۆ میناک، د سالا 2013 دە، ھەولدانەک ژ بۆ کۆنگرەیا یەکیتیا نەتەوەیی یا کوردستانێ ھەبوو. ل رۆژئاڤا دەرفەتێن ئازادیەکا مەزن ھەبوو. ھەرێما کوردستانێ، ب سەرۆکاتیا سەرۆک بارزانی، ھەم ژ ھێلا مادی و ھەم ژی ژ ھێلا مەعنەوی ڤە پشتگری دا رۆژئاڤا. پەکەکە و پێکھاتەیا وێ یا رۆژئاڤا، یەپەگە، جارەکە دن ژ چاڤکانیێن پەدەکێ مفا وەرگرت. پشتی دەمەکێ پەدەکە وەک دژمن ئیعلان کر. ھەیا ژ بۆ پووچکرنا کۆنگرەیا نەتەوەیی د 27-28 خزیرانا 2013ێ دە ل عاموودێ کۆمکوژیەک ئەنجامدا.
ب راستی، ژ وێ دەمێ ڤە، پەکەکێ دژمناتیا خوەیا ل دژی پەدەکێ گھاندیە ئاستا ھەری بلند.
و نھا، ب ڤێ سجیلا تاری یا پەکەکێ، گەلۆ ئەم دکارین باوەریا خوە ب بانگا ئۆجالان یا ژ بۆ یەکیتیا نەتەوەیی و پێشنییارا وی بۆ سەرۆک بارزانی وەکی سەرۆکێ کۆنگرەیێ سەمیمی ببینین؟
داخویانیا “ئۆجالان بانگا یەکیتیا نەتەوەیی کر و ژ بۆ سەرۆکاتیا وێ ژی سەرۆک بارزانی پێشنیار کر” ئۆجالان ب ڤێ داخویانیێ دخوازە کراسێ نەتەوی بکە بەر پەکەکێ. ھەر وھا ئەو کۆنگرەیا ئارماناجا وێ نەدییار هەر گەاڤا ژ لایێ ھێزێن کوردی ڤە ھات رەد کرن ئەو دێ ببێژن “ئەو یەکتیا نەتەوەیی یا کورد ناخوازن.” لێ د راستیێ دە، پەکەکە خوەدی وێ ئیرادەیێ نینە کو بانگا یەکتیا نەتەوەیی بکە.
دەما کو عەڤدللا ئۆجالان بەحسا یەکتیا نەتەوەیی دکە، ئەو قەت بەحسا “یەکتیا نەتەوەیی یا کوردان یان کوردستانێ” ناکە. ئۆجالان ھەتا کوردان وەکی نەتەوەیەکێ ناس ناکە. ب راستی، د بەلگەیێن کۆنگرەیا پەکەکێ دە، ئۆجالان ھەتا زمانێ کوردی وەکی “تەنەکا گلێشی” پێناسە دکە. وی ھەتا ب ئەشکەرەیی دیار کر کو ئەو ژ بۆ کوردان خەلەت دبینە کو مافێن نەتەوەیی و چاندی بخوازن. کەسەک کو دۆزا وی کوردایەتی یان کوردستان نەبە ما قەی دکارە بانگا یەکیتیا نەتەوەیی ژ بۆ کوردان بکە؟ نا.
ئۆجالان ل سەر داخوازا دەولەتا ترک ل ئیمرالیێ داخوازا یەکتیا کوردان کر. بانگا ئۆجالان یا ژ بۆ یەکیتیێ نە ژ بۆ یەکیتییا ناڤ مالا کوردان بوو. بانگا ئۆجالان ژ بۆ وێ یەکێیە کو ھەموو کورد پابەندی پەیمانا میساقا مللی یا دەولەتا ترک ببن. ئۆجالان ل بەرامبەری ناسکرنا وی سۆز دایە دەولەتا ترک کو ھەمی کوردان ب وان ڤە گرێبدە.
یەکیتیا نەتەوەیی نە ب گۆتنان، ب جەوھەری هێتە کرن. گەر پەکەکە یەکتیا نەتەوەیی دخوازە، دڤێت دەستپێکی داخوازێن خوەیێن ژ بۆ کوردان ب زەلالی دیار بکە.
دڤێت ل دژی ھەموو پارتیێن کورد یێن ل رۆژھلات، باشوور و رۆژئاڤا ئاگربەستێ ساز بکە و گارانتی بکە کو ئەوێ چەکان بکار نەینە.
دڤێت ھێزێن خوەیێن د ناڤ حەشدا شەعی دە بەلاڤ بکە. دڤێت ئەو دەڤەرێن ستراتەژیک یێن کو ل باشوورێ کوردستانێ داگی ر کرنە، رادەستی ھێزێن فەرمی یێن پێشمەرگە بکە. دڤێت وی زمانێ ژەھری یێ د مەدیایا خوە دە کو د ناڤبەرا کوردان دە ناکۆکیان چێدکە بێدەنگ بکە.
ھەیانی کو ئەڤ یەک پێکنەیێ یەکیتیا نەتەوەیی لگەل پەکەکێ نایێ چێکرن. یەکیتیا نەتەوەیی نە ب گۆتنانە، لێ ب کرنانە. دڤێت پەکەکە دەستپێکێ ژ بەر ئێریشێن خوەیێن ل دژی پارتیێن دن یێن کوردان د 50 سالێن بۆری دە ئەنجامدای خوە رەخنە بکە. بێیی ڤان، بانگا ئۆجالان و پارتیا وی یا ژ بۆ یەکیتیا نەتەوەیی نە ژ بۆ بلندکرنا تێکۆشینا کوردانە، بەلکو ژ بۆ گرێدانا دەستولنگێن ھێزێن کوردە.
