ھەڤسەرۆکێ گشتی یێ دەم پارتیێ تونجەر باکرھان، ژ بەر زمانێ کو مەدیا ل دژی “پێڤاژۆیا ئاشتیێ” بکار تینە، نەرازیبوون نیشان دا و گۆت، “هێژ زمانێ وان نەگوھەریە.” باکرھان ب تایبەتی رەخنە ل مەدیایا دژبەر گرت و گۆت، ئەو وەک مەدیایا دەستھلاتداریێ د بن گای دا ل گۆلکی دگەرن.
ھەڤسەرۆکێ گشتی یێ پارتیا وەکھەڤی و دەمۆکراسیێ یا گەلان (دەم پارتی) تونجەر باکرھان ئیرۆ 2 تەباخێ د چارچۆڤەیا “ھەڤدیتنێن ئاشتی و جڤاکا دەمۆکراتیک” دە ل ئەنقەرێ لگەل نوونەرێن رێخستنێن جڤاکا سڤیل جڤیا. جڤین ل ناڤەندا پەروەردە و چاندێ یا ئۆدەیا ئەندازیارێن ماکینەیان (MMO) یا گرێدایی یەکیتیا ئۆدەیێن میعمار و ئەندازیارێن ترکیەیێ (TMMOB) پێک ھات.
باکرھان د ئاخافتنا خوە دە بال کشاند سەر پێڤاژۆیا نوو و رەخنەیێن توند ل زمانێ کو دەستھلاتداری و مەدیا ل دژی ڤێ پێڤاژۆیێ ب کار تینن، گرت.
“د بن گای دە ل گۆلکێ دگەرن”
باکرھان دیار کر، د چارچۆڤەیا ھەڤدیتنێن خوە دە نێزیکی 2 ھەزار جڤین لگەل خەلکی ئەنجامداینە و ژ ڤان جڤینان دەرسێن مەزن وەرگرتنە. ھەروھا دەستنیشان کر، ئەڤ پێڤاژۆیە نە تەنێ ژ بۆ کوردانە، لێ بەلێ داخوازەکە ژ بۆ ئاشتی، دادپەروەری و دەمۆکراسیێ ژ بۆ تەڤاھیا ترکیەیێ.
باکرھان ھەلوەستا مەدیایێ ب توندی رەخنە کر و گۆت: “ھوون مافدارن، ل دەرڤە تێگھشتنەکا جودا ھەیە. د رایا گشتی دە نیقاشێن دن تێن مەشاندن. بەشەک ژ مەدیایێ مانشەتان دهاڤێژن و دبێژە ‘وەلات پارچە دبە’، ب گۆتنەکا دن، د بن گای دە ل گۆلکێ دگەرن. ژ نرخاندنێن سێ رووپەلی، دو پەیڤان ب مووچنکێ دەردخن و ھەول ددن ل سەر وێ تێگھشتنێ چێبکن.”
ھەڤسەرۆکێ دەم پارتیێ ب تایبەتی رەخنە ل مەدیایا دژبەر گرت و ھەلوەستا وێ وەک شاشیەکا مەزن ب ناڤ کر و گۆت: “ئەڤ یەک مە گەلەک شاش کر. دڤیابوو جھێ کو مەدیایا دژبەر لێ سەکنیە نە ئەڤە با.”
باکرھان تەکەز کر ژی، ئەو دێ لگەل خەلکی و کەدکاران ڤان ئاستەنگیان دەرباس بکن و ژ بۆ پێشەرۆژێ نیقاشێن خوە بدۆمینن.
