ئیرۆ سالڤەگەرا کارەساتا شنگالێیە

د 3 تەباخا 2014ێ دە، پشتی کو ئارتێشا ئیراقێ ل مووسلێ شکەست، تەرۆریستێن داعشێ ئێریشی باژارێ شنگالێ کرن و ئەو داگیر کرن.

ژ بەر وێ سەدەمێ ھزاران کەس ژ کوردێن ئێزدی و خەلکێن وی باژاری کەتن دەستێ داعشێ و وان تەرۆریستان کارەساتەکا مەزن ب سەر وان دە ئانی و ب ھەزاران کەس شەھید و بریندار کرن و ھەتا نھا ژی ب ھەزاران کەسێن دن چارەنڤیسا وان نەدیارە.

پشترە د 13/11/2015 ھێزێن پێشمەرگە د ئۆپەراسیۆنەکی دە ب سەرپەرەشتیا سەرۆک بارزانی، شنگال ژ دەستێ چەکدارێن داعشێ رزگار کرن.

سەرۆک بارزانی د 13/11/2025ێ، ب بۆنەیا رزگارکرنا شنگالێ د پەیامەکی دە پیرۆزباھی ل خەلکێ شنگال و ھێزێن پێشمەرگە کر و راگەھاند: “ئازاد کرنا شنگالێ د بن دەستێ تەرۆریستێن داعشێ دە د وارێ لەشکەری و سیاسی و دیرۆکی دە سەرکەفتنەکا مەزن بوو ژ بۆ گەلێ کوردستانێ، کو ل سەر دەستێ پێشمەرگەیێن مەیێن قەھرەمان ھات تۆمار کرن. ئەڤ سەرکەفتن ژ ھەموو ئالیەکی رە دبێژە کو ئێدی ئەو رۆژ چوو کو داگیرکەر و زلمکارێن گەلێ کوردستانێ زۆرداری دکرن. نھا گەلێ کوردستانێ ب سەربلندی بەرەڤانیا خوە دکە و دژمن دشکێنە و پارێزڤانێ نرخێن مرۆڤاتیێیە.”

سەرۆک بارزانی ھەروەھا راگەھاند: “پشتی داگیرکرنا شنگالێ و کارەساتا کو ب سەرێ خوشک و برایێن مەیێن ئێزیدی دە ھات، ئەم ئامادە بوون کو ھەر تەدبیر بگرن و ھەر بەدەل بدن دا کو شنگالێ ئازاد بکن دا کو باوەریا گەلێ کورد و خوشک و برایێن مەیێن ئێزیدی ڤەگەرینن و دژمن و تەرۆریستان ل خاکا پیرۆزا کوردستانێ دەربخن.”