سەرۆکێ ھەرێما کوردستانێ نێچیرڤان بارزانی د 11ێ سالڤەگەرا جینۆسایدا ئێزدیان دە پەیامەک بەلاڤ کر و راگھاند، ئەرکێ حکوومەتا ئیراقێ یە کو خوەدی ل وەلاتیێن ئێزدی دەرکەڤە، وان قەرەبوو بکە و ئێدی رێ نەدە کو شنگال ببە “گۆرەپانا گەر و فەتلێن ملیس و کۆمێن چەکدار”.
د پەیامەکا نڤیسکی دە کو ئیرۆ 3ێ تەباخێ ھات بەلاڤکرن، نێچیرڤان بارزانی خەمگینی و نیگەرانیا خوە یا کوور ئانی زمان کو پشتی 11 سالان، ھێژ ژی نێزیکی نیڤا ئێزدیان د ناڤ رەوشەکا دژوار یا ئابۆری، جڤاکی و دەروونی دە د کامپان دە دژین.
دەقا پەیاما سەرۆکێ ھەرێما کوردستانێ:
ئیرۆ بیرئانینا ب ئێش یا یانزدەھ سالیا جینۆسایدا ئێزدیان دکین و ب رێز و وەفاداریێ جانگۆریێن وێ تاوانکاریا داعشێ، ب بیر تینین. پێداگرێ پێشکێشکرنا ھەموو پشتگیریەکێ ژ بۆ وەلاتیێن مەیێن ئێزدی و ژ بلی ھەموو ئێشێن رابووری، ب ھێڤیێ ڤە ل پاشەرۆژێ دنێرین و ژ بۆ کەواندنا برینێن وان، ب ھەڤرە کار دکین.
جھێ داخێ و دلگرانیەکا زێدەیە کو یانزدەھ سالە ھێژ ژی نێزیکی نیڤا ئێزدیان، ل رەوشەکا دژوار یا ئابۆری و جڤاکی و دەروونی دە ل وارگەھان دە دژین. ئەرکێ حکوومەتا ئیراقێ یە باشتر خوەدیتیێ ل وەلاتیێن ئێزدی بکە و وان قەرەبوو بکە، ئێدی رێ نەدە شنگال و ناڤچەیێن ئێزدیان، قادا ناڤەندا میلیشیا و گرووپێن چەکدار و یەک ئالیکرنا ئەجیندایێن ھەرێمی بن.
دڤێت باوەری، پشتراستی، ئارامی، ئاساییش، ئاڤادانی و خزمەتێ بۆ شنگال و ناڤچەیێن دن ڤەگەرێنین، دادپەروەری ژ بۆ جڤاکا ئێزدی پێکبینە و تاوانبار بێنە سزا دان. ژ بۆ وێ یەکێ تەکەز ل سەر ب جیھکرنا پەیمانا حکوومەتا ھەرێما کوردستانێ و حکوومەتا ئیراقا فەدەرال یا ژ بۆ نۆرمال کرنا رەوشا شنگالێ و ب پارێزگەھ کرنا وێ دکین. ھەر وھا داخوازێ ژ جڤاکا ناڤدەولەتی دکین ل ھەموو روویەک ڤە زێدەتر ب تەشویق و ھانا ئێزدیان ڤە بێ.
سپاسیا وان ھەموو وەلاتان دکین کو کۆمکوژیا ئێزدیان ژی ب جینۆساید ناساندنە و ل کار و ھەولێن خوە بەردەوام دبین ھەتا ل سەر ئاستا ناڤدەولەتی دە زێدەتر ب جینۆساید بهێت ناسین. سپاس و روومەت ژ بۆ هاریکاریێن ھەڤپەیمانیا ناڤدەولەتی یا د تێکشکاندنا داعشێ دە. خووشک و برایێن خوەیێن ئێزدی پشتراست دکین کو ھەردەم پارێزەرێ وان دبین و ھەتا رەڤاندیەکا ئێزدی مابە، کارێ نڤیسینگەھا مە یا رزگارکرن و ئەشکەرەکرنا چارەنڤیسا وان بەردەوام دبە.
سلاڤ ل بیرئانین و روحا جانگۆریێن ئێزدیان و ل ئیرادەیا بھێز و بەرخوەدانا ئێزدیان. سلاڤ ل یاد و گیانێ وان ھەموو پێشمەرگەیێن قەھرەمان کو د بن فەرماندەییا جەنابێ سەرۆک مەسعوود بارزانی، ژ بۆ رزگارکرنا شنگالێ و ھەموو پێکھاتێن کوردستان و ئیراقێ جانێن خوە گۆری کرن.
نێچیرڤان بارزانی
سەرۆکێ ھەرێما کوردستانێ
3/8/2025
