د 11ەمین سالڤەگەرا کارەساتا شنگالێ دە، سەرۆک مەسعوود بارزانی پەیامەک بەلاڤ کر و تێ دە راگھاند، تاوانا ل دژی ئێزدیان، بەردەوامیا زنجیرا کارەساتێن ل دژی گەلێ کوردستانێیە و بانگ ل دەولەتا ئیراقێ کر کو قەرەبوویا قوربانیێن شنگالێ و ھەموو جینۆسایدێن دن یێن ل دژی گەلێ کوردستانێ ھاتنە کرن، بکە.
سەرۆک بارزانی د دەستپێکا پەیاما خوە دە بال کشاند سەر ھۆڤیتیا تاوانێ و گۆت: “ئەو تاوانا کو تەرۆریستێن داعشێ یازدەھ سال بەرێ ل دژی خوشک و برایێن مەیێن ئێزدی کرن، تاوانەک بوو کو ھەموو سینۆرێن نەمەردی و ھۆڤیتیێ دەرباس کربوون. ئەڤ ئێشەکە کو ت جاری ژ بیرا مە ناچە.”
دەستنیشان کر ژی، ئێزدی ژ بەر دو سەدەمان بوونە ئارمانجا داعشێ: “ل بەر چاڤێن ھەرکەسی زەلالە کو ئێزدی ژ بەر کوردبوونا خوە و ژ بەر باوەریا خوە یا ئۆلی، کەتن بەر پێلا رک و بێوژدانییا تاوانبارێن داعشێ و ھاتن جینۆسایدکرن.”
سەرۆک بارزانی رۆلا پێشمەرگە و گەلێ کوردستانێ د رزگارکرنا شنگالێ دە بلند نرخاند و گۆت: “پشتی روودانا وێ کارەساتێ، گەلێ کوردستانێ و پێشمەرگە ب دل و جان ل گەل خوشک و برایێن خوە بوون و چ ژ دەستێ وان ھات ژ بۆ رزگارکرنا کۆچبەران و ئازادکرنا شنگالێ و چیایێ شنگالێ کرن.”
ھەروھا ب تایبەتی قەھرەمانیا پێشمەرگە ب بیر ئانی و گۆت: “ئەم رۆلا پێشمەرگەیێن کوردستانێ و ھەموو وان قەھرەمانان بلند دنرخینن کو دیرۆکەکە گەش تۆمار کرن، ژ بۆ ئازادکرنا شنگالێ خوینا خوە رژاندن، تۆلا خوە ژ تەرۆریستێن داعشێ ھلانین و سەرێ تەرۆریستان خستن بن پێیێن ئێزدیان.”
سەرۆک بارزانی ھەروھا سپاسیا ھێزێن ھەڤپەیمانان کر کو د ئالیکاریا پێشمەرگە و تێکشکاندنا داعشێ دە رۆلەکە بەرچاڤ لیستن.
د داویا پەیاما خوە دە، سەرۆک بارزانی بانگ ل دەولەتا ئیراقێ کر: “پێویستە دەولەتا ئیراقێ قەرەبوویا قوربانیێن کارەساتا شنگالێ و ھەموو وان جینۆسایدێن کو دەرحەقێ گەلێ کوردستانێ دە ھاتنە کرن، بکە. دڤێت داوی ل وان بیر و رەفتارێن شۆڤینی وەرە ئانین کو ھەر جارێ ب بەھانەیەکێ و ب زھنیەتا نەمرۆڤانە و ئینکارکەر، ئێشێ ددن گەلێ کوردستانێ.”
