د 11ەمین سالڤەگەرا جینۆسایدا ئێزدیان دە، سەرۆکوەزیرێ ھەرێما کوردستانێ مەسروور بارزانی پەیامەک بەلاڤ کر و تێ دە تەکەزی ل سەر گرینگیا جیبجیکرنا پەیمانا شنگالێ کر. ھەروھا بانگ ل حکوومەتا فەدەرال یا ئیراقێ کر کو بەرپرسیاریا خوە ب جھ بینە و ئێزدیان قەرەبوو بکە.
د پەیاما خوە دە، سەرۆکوەزیر بارزانی گۆت: “د سالڤەگەرا داگیرکرنا شنگالێ و جینۆسایدکرنا خوشک و برایێن مەیێن ئێزدی دە ژ ئالیێ تەرۆریستێن داعشێ ڤە، ئەم ب رێزداری شەھیدێن ڤێ کۆمکوژیێ ب بیر تینن کو د دیرۆکا گەلێ کوردستانێ و مرۆڤاھیێ دە بوویە برینەکە کوور و ساخنەبوویی.”
سەرۆکوەزیرێ ھەرێما کوردستانێ د ڤێ بیرئانینێ دە بال کشاند سەر رۆل و قوربانیدانا پێشمەرگە و گۆت: “پێویستە ئەم ب رێزداری فەداکاری و قوربانیێن پێشمەرگەیێن قەھرەمانێن کوردستانێ ب بیر بینن کو ب رێبەرتیا جەنابێ سەرۆک بارزانی، شنگال و دەردۆرا وێ رزگار کرن. ھەروھا ئەم سپاسیا ھەلوەستا مێرخاسانەیا خەلکێ کوردستانێ ب گشتی و ب تایبەتی پارێزگەھا دھۆکێ و دەڤەرا بادینانێ دکن کو ب ھاوارا خوشک و برایێن مەیێن ئێزدی ڤە چوون.”
بانگا ل حکوومەتا فەدەرال یا ئیراقێ
مەسروور بارزانی ب ئاوایەکی زەلال داخوازێن خوە ژ بۆ حکوومەتا ئیراقێ ئانی زمان و گۆت: “پێویستە حکوومەتا فەدەرال ئەرک و بەرپرسیاریا خوە بجھ بینە، خوشک و برایێن مەیێن ئێزدی قەرەبوو بکە، ئالیکاریا کۆچبەران بکە و زەمینێ خوەش بکە دا کو ب سەربلندی ڤەگەرن سەر جھ و وارێن خوە.”
ھەروھا تەکەز کر کو رێیا ڤێ یەکێ “ب جیبجیکرنا پەیمانا شنگالێ، دەرکەتنا ھێزێن چەکدار و ملیسان ژ دەڤەرێ و ڤەگەراندنا ئاشتی و ئاساییشێ ژ بۆ ناڤچەیێ” پێکانە.
ھەولێن حکوومەتا ھەرێمێ ددۆمن
سەرۆکوەزیر بارزانی دەستنیشان کر کو حکوومەتا ھەرێما کوردستانێ د ھەولێن خوە دە بەردەوامە ژ بۆ:
-رزگارکرن و ڤەگەراندنا ھەموو کەسێن رەڤاندی یێن کو ھین نەھاتنە ئازادکرن.
– دیتن و دیارکرنا چارەنڤیسا کەسێن وندایی.
– بەردەوامکرنا پشتگریا دارایی ژ بۆ رزگاربوویان.
– ئالیکاریکرنا وان ئێزدیێن کو ژ بەر نەئاساییبوونا رەوشا شنگالێ ھین ژی ل کامپان دژین.
سەرۆکوەزیر مەسروور بارزانی دەستنیشان کر کو ژ بەر جیبجینەکرنا پەیمانا شنگالێ و رەوشا نەخوەستییا کو پشتی رزگارکرنێ ل سەر شنگالێ ھاتیە سەپاندن، نەھاتیە کارین کو ناڤچە بهێت ئاڤاکرن و خزمەتگوزاریێن پێویست پێشکێشی خەلکێ وێ بهێن کرن.
ئیرۆ 11 سال ب سەر کۆمکوژیا شنگالێ دەرباس دبن. د 3ێ تەباخا 2014ێ دە، داعشێ 6417 وەلاتیێن ئێزدی رەڤاندن. ھەتا نھا زێدەتری 3590 کەس ژ وان ھاتنە رزگارکرن، لێ چارەنڤیسا نێزیکی 2800 کەسێن دن ھین ژی نە دیارە.
