فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی د هەڤپەیڤینەکە بەرفرەهـ دە هوورگلیێن لهەڤکرنا 10ێ ئادارێ یا ب حکوومەتا نوو یا سووریەیێ رە ئەشکەرە کر و راگهاند، که‌نالێن پەیوەندیان یێن راستەراست ب ترکیەیێ رە هاتنە ڤەکرن. عه‌بدی دا زانین کو ئەنقەرە ژ بۆ جیبجیکرنا لهەڤکرنێ زەختێ ل شامێ دکە.
عه‌بدی تەکەز کر، پشتی هلوەشینا رەژیما ئەسەد د 8ێ بەرچلەیا 2024ان دە، سووریە کەتیە ناڤ ڤەگوهەرینەکە سیاسی و ژیۆپۆلیتیک یا بنگەهین و ژ تەوەرەیا ئیران-رووسیایێ دەرکەتیە و بەر ب میحوەرێ دژبەر ڤە چوویە.
پەیمانا 10ێ ئادارێ
مەزلووم عه‌بدی ئەشکەرە کر، لهەڤکرنا 10ێ ئادارێ یا ب سەرۆکێ سووریەیێ ئەحمەد ئەل-شه‌رع رە، پشتی رێزە هەڤدیتنێن کو د داویا کانوونا 2024ان دە ل شامێ دەست پێ کربوون، پێک هاتیە. وی دا زانین کو دانوستاندنێن دەستپێکێ نەگهیشتن ت ئەنجامێ.
عه‌بدی گۆت: “دیالۆگ ب ناڤبەینکاریا رێخستنێن جڤاکا سڤیلێن ئامەریکی و بریتانی بەردەوام کر، هەتا کو ئەم گهیشتن جڤینا دویەمین د 10ێ ئادارێ دە. ژ بەر زێدەبوونا مەترسیا شەرێ مەزهەبی و پەڤچوونان ل هەرێمێن جودایێن سووریەیێ، مە ل سەر ئاگربەستەکە ل سەرانسەرێ وەلات ل هەڤ کر.”
فەرماندارێ گشتییێ هسدێ تەکەز کر، ئارمانجا سەرەکە یا لهەڤکرنێ، راوەستاندنا شەر و یەککرنا وەلاتێ کو د ناڤبەرا چار دەستهلاتێن جودا دە پارچە بووبوو، بوویە. دا زانین کو زێدەبوونا ئالۆزیان د ناڤبەرا پێکهاتەیێن گەلێ سووریەیێ دە، بوو سەدەم کو بلەز بگهیژن ڤێ لهەڤکرنێ دا کو رێ ل بەر شەرەکی ناڤخوەیی وەرە گرتن و ڤەگەرا سڤیلان مسۆگەر ببە.
عه‌بدی دیار کر، د لهەڤکرنێ دە تەنێ خالێن گشتی هاتنە ئەرێکرن و هوورگلی ژ بۆ گەرێن پاشەرۆژێ یێن دانوستاندنان هاتنە هشتن. هەروها گۆت، یا هەری گرینگ لهەڤکرنا ل سەر بداویکرنا شەر و چارەسەرکرنا پرسگرێکان ب رێیا دیالۆگێ بوو، کو د سەرێ وان دە دۆزا کوردی تێ.
هەلوەستا ترکیەیێ و رۆلا ناڤدەولەتی
دەربارێ رۆلا هێزێن دەرڤە دە، عه‌بدی دا زانین کو هێزێن ئامەریکی د دەما چوونا وانا شامێ دە تەنێ پشتگریەکە لۆژیستیک دانە وان، لێ بەشداری جڤینان نەبوونە.
ل سەر هەلوەستا ترکیەیێ، عه‌بدی گۆت، “ترکیە نە ئالیەکی راستەراست یێ لهەڤکرنێ بوو، لێ تەڤی هەلوەستا خوە یا ناسکری یا ل هەمبەر هسدێ، ل دژی لهەڤکرنێ دەرنەکەت.”
عه‌بدی هەروها ئەشکەرە کر، که‌نالێن پەیوەندیان یێن راستەراست ب ترکیەیێ رە هەنە و ئەڤ یەکێ وەک “ئەرێنی” بناڤ کر. دا زانین ژی: “ئەنقەرە بانگا جیبجیکرنا لهەڤکرنا 10ێ ئادارێ دکە و زەختێ ل شامێ دکە کو ب هه‌سه‌دێ رە بگهیژە تێگهشتنەکێ.”
فەرماندارێ هه‌سه‌دێ دەستنیشان کر، تەڤی هەبوونا ناکۆکیان ژی، هه‌سه‌ده د رەوشا یەکبوونا سووریەیێ دە خوە وەک بەشەکی خوەزایی یێ ئارتێشا سووریەیێ دبینە. هەروها دا زانین کو ئامەریکا، فرانسا و بریتانیا هین ژی د دانوستاندنێن ب حکوومەتا سووریەیێ رە بەشدارن، کو ئەڤ یەک گرینگیەکە جدی یا ناڤدەولەتی ژ بۆ چارەسەریەکە سیاسی یا بەرفرەهـ نیشان ددە.
