ئەندامێ کۆنسەیا رێڤەبەرا کۆما جڤاکێن کوردستانێ (کەجەکێ) مستەفا کاراسوو، دەربارێ “کۆمیسیۆنا ئاشتیێ”یا کو نوو ل پارلامەنتۆیا ترکیەیێ ھاتیە ئاڤاکرن دە داخویانی دا و راگھاند، ھەر چەند ئاڤاکرنا کۆمیسیۆنەکا وھا د بنگەھ دە گاڤەکا گرینگ بە ژی، ئارمانجێن وێ ب تەمامی نە زەلالن و دەما کارێ وێ پر کێمە.
مستەفا کاراسوو گۆت: “پێویستە پرسا کورد ب رێیا دەمۆکراتیکبوونێ ل پارلامەنتۆیێ بێ چارەسەرکرن. ئاڤاکرنا کۆمیسیۆنێ د ناڤا پارلامەنتۆیێ دە تشتەکی گرینگە؛ لێ یا ژ وێ گرینگتر ئەوە کو دێ ئەڤ کۆمیسیۆن چاوا کار بکە و ئارمانجێن وێ چ بن؟”
کاراسوو دا زانین، دڤیابوو کۆمیسیۆن ب یاسایەکێ بھاتا ئاڤاکرن دا کو ئارمانجێن وێ زەلالتر و ئەشکەرەتر بوونا، و پرسی: “گەلۆ کۆمیسیۆن دێ چاوا ژ بۆ دەمۆکراتیکبوونا ترکیەیێ و چارەسەرکرنا پرسا کورد کار بکە؟”
دەربارێ دەما کارێ کۆمیسیۆنێ دە، ئەندامێ کۆنسەیا رێڤەبەرا کەجەکێ دەستنیشان کر: “دەمەکە دو-سێ مەھان ژ بۆ کارێ کۆمیسیۆنێ ھاتیە دیارکرن؛ ئەڤ دەم گەلەکی کێمە و وسا دخویە کو تەنێ ژ بۆ چارەنووسا دانینا چەکان کار دکە، کو ئەڤ ب تەنێ نە بەسە. دڤێت کۆمیسیۆن ل سەر چاڤکانیا وان سەدەمان کار بکە کو بوونە ئەگەرا ئاڤابوونا پارتیا کارکەرێن کوردستانێ (پەکەکێ)، کو ئەو ژی دۆز و پرسا کوردە.”
ئەڤ داخویانی پشتی وێ یەکێ ھات کو دوھ 5ێ تەباخا 2025، کۆمیسیۆنا پارلامەنتۆیا ترکیەیێ ب سەرۆکاتیا سەرۆکێ پارلامەنتۆیێ نومان کورتولموش جڤینا خوەیا یەکەم ل دار خست و ناڤێ کۆمیسیۆنێ وەکە “کۆمیسیۆنا دەمۆکراسی، براتی و یەکرێزیا نشتمانی” دەستنیشان کر.
کۆمیسیۆن ژ 48 ئەندامان پێک تێ، کو تێ دە 21 ئەندام ژ ئاک پارتیێ، 10 ژ جەهەپێ، و 4 ئەندام ژ ھەر یەک ژ دەم پارتی و مەھەپێ نە.
