حکوومەتا سووریەیێ دەربارێ “کۆنفەرانسا یەکھەلوەستیا پێکھاتەیان” دە راگھاند، ئەو د پرەنسیبێ دە پشتگریا دیالۆگێ دکن، لێ شەرتێ سەرەکی، پاراستنا یەکیتیا ئاخ و گەلێ سووریەیێ یە و ھشیاری دا کو شێوازێ دەولەتێ ب “گەف و ھێزا چەکداری” نایێ دیارکرن.
ئاژانسا “سانا” یا فەرمی یا سووریەیێ ئیرۆ 9ێ تەباخێ ل سەر زارێ ژێدەرەکی بەرپرسیار یێ حکوومەتا سووریەیێ بەلاڤ کر، مافێ وەلاتیان یێ کۆمجڤینا ئاشتیانە و دیالۆگا ئاڤاکەر ھەیە و دەولەت ڤی مافی دپارێزە، لێ دڤێت ئەڤ یەک “د چارچۆڤەیا پرۆژەیا نشتمانی یا یەکگرتی دە بە کو یەکیتیا سووریەیێ وەک ئاخ، گەل و سەروەری بپارێزە.”
وی ژێدەری ھەروھا تەکەز کر، کۆمێن ئۆلی و نەتەوەیی خوەدی مافن کو نێرینێن خوەیێن سیاسی دیار بکن، جڤینان لدار بخن و پارتیان دامەزرینن، لێ ب مەرجێ کو چالاکیێن وان ئاشتیانە بن، “ل دژی دەولەتێ چەکی رانەکن” و نێرینێن خوە ل سەر شێوازێ دەولەتا سووریەیێ فەرز نەکن.
د داویا داخویانیێ دە، حکوومەتا سووریەیێ رەد کر کو شێوازێ دەولەتێ ب “لھەڤکرنێن فراکسیۆنی” بهێت دیارکرن و گۆت، ئەڤ مژار تەنێ ب “دەستوورەک دایمی کو ب رەفەراندوومەکا ناڤخوەیی بهێت پەسەندکرن” دکارە بێ چارەسەرکرن. ھات گۆتن کو ھەر چەندە مافێ ھەر وەلاتیەکی ھەبە نێرینا خوە پێشکێش بکە ژی، دڤێت ئەڤ یەک ب رێیا “دیالۆگا گشتی و سندۆقێن دەنگدانێ” بە، نە ب “گەف یان ھێزا چەکداری”.
ئەڤ داخویانیا وی ژێدەرێ حکوومەتا شامێ پشتی وێ تێ، دوھ ل باژارێ حەسەکێ یێ رۆژئاڤایێ کوردستانێ، “کۆنفەرانسا یەکیتیا پێکھاتەیان” ھات لدارخستن. د ئەنجامنامەیا کۆنفەرانسێ دە، بانگا ئاڤاکرنا سووریەیەکا نەناڤەندی و دەمۆکراتیک ھات کرن، کو تێ دە مافێن ھەمی پێکھاتەیان ب دەستوورەک نوو بێنە مسۆگەرکرن.
