ھێزێن سووریەیا دەمۆکراتیک (ھەسەدە) حکوومەتا شامێ و کۆمێن چەکدارێن گرێدایی وێ ب بنپێکرنا ئاگربەستێ ل دێرازۆرێ، تل تەمر و دەردۆرا حەلەبێ تاوانبار دکە. ل گۆری ھەسەدێ، ئەڤ ئێریشێن دوبارە “پەیمانا د ناڤبەرا فەرماندارێ گشتی مەزلووم عەبدی و ئەحمەد شەرع دە دخن مەترسیێ.”
ناڤەندا راگھاندنێ یا ھەسەدێ ئیرۆ 9ی تەباخێ د داخویانیەکێ دە راگھاند، د دەمەکێ دە کو گەلێ سووریەیێ ل بەندا ئارامیێ یە، کۆمێن چەکدارێن گرێدایی ترکیێ و یێن د بن سیوانا حکوومەتا شامێ دە، بنپێکرنێن خوەیێن ل دژی ئاگربەستێ ددۆمینن.
ل گۆری داخویانیێ، ئەڤ کۆمێن چەکدار ل ھەرێمێن وەکی دێرا زۆرێ، دێر حافر، بەنداڤا تشرینێ و تل تەمر ئێریشان پێک تینن. ھەر وھا ھات گۆتن، “تەڤگەرێن ب گومان” ل دەردۆرا تاخێن شێخ مەقسوود و ئەشرەفیێ یێن ل باژارێ حەلەبێ ھەنە، کو ئەڤ یەک بنپێکرنەکە ئەشکەرە یا پەیمانا د ناڤبەرا رێڤەبەریا ھەر دو تاخان و رێڤەبەریا شامێ دەیە، یا کو د 1ێ نیسانا 2025ێ دە ھاتبوو ئیمزەکرن.
ھەسەدێ دیار کر، کۆمێن ناڤبۆری زێدەتری 22 جاران ئێریشی ھەرێمێن وان کرنە، تێ دە چەکێن گران ب کار ئانینە. ھەر وھا ئێریشێن بەژاھی و ھەولدانێن دەرباسبوونا چەمێ فراتێ ژ بۆ ئێریشکرنا سەر بارەگەھێن ھێزێن مەیێن ل دێرازۆرێ پێک ئانینە.
د ئەنجاما ڤان ئێریشان دە، ل گۆری داخویانیێ، زێدەتری 11 سڤیلان بریندار بوونە و زیانەکا مەزن گھیشتیە ھەرێمێن سڤیلان.
ھەسەدێ تەکەز کر، ئەڤ ئێریش “لگەل پەیمانا ئەحمەد شەرع و فەرماندارێ گشتی یێ ھەسەدێ مەزلووم عەبدی ناگونجن،” ژ بەر کو جەوھەرا ڤێ پەیمانێ ل سەر راوەستاندنا تاما ئاگربەستێ و پاراستنا سڤیلان ھاتیە ئاڤاکرن.
د داخویانیێ دە ھات گۆتن: “مە د تەڤاھیا دەما بۆری دە خوە راگرت و ل گەل ئێریشان ژی مە ھەول دا ئارامیێ بپارێزین. لێ بەردەوامیا ڤان ئێریشان گەفێ ل باوەریا ھەڤبەش دخوە و لھەڤکرنان دخە بەر جەرباندنێ. حکوومەتا شامێ بەرپرسیاریا تام ھلدگرە.”
بانگا ھەسەدێ
د داویا داخویانیا خوە دە، ھەسەدێ ئەڤ بانگ و داخواز پێشکێش کرن:
-ئەم داخوازێ ژ حکوومەتا شامێ، کۆمێن گرێدایی وێ، و ھەروھا کۆمێن ژ ئالیێ ترکیێ ڤە تێن ئالیکاریکرن دکن کو ھەموو بنپێکرنان راوەستینن و پابەندی خالێن پەیمانێ ببن.
– ئەم بانگ ل جڤاکا ناڤنەتەوەیی و رێخستنێن مافێن مرۆڤان دکن کو ڤان بنپێکرنان بشۆپینن و ژ بۆ مسۆگەرکرنا رێزگرتنا ل پەیمانان بخەبتن.
– ئەم دەستێ خوە ژ بۆ دیالۆگ و ھەڤکاریێ درێژ دکن ژ بۆ سووریەیەکا ئەولە و ئارام، لێ د ھەمان دەمێ دە ئەم ئامادە نە کو ژ بۆ پاراستنا ماف و ئەولەھیا گەلێ خوە ھەر تشتێ پێویست بکن.
