رەڤاندنا زارۆکان ل رۆژئاڤایێ کوردستانێ و دەڤەرێن د بن دەستهلاتا هەسەدێ دە ژ ئالیێ چەتەیێن ب ناڤێ “جوانێن شۆرەشگەر”ڤە کو راستەراست فەرمانا ژ پەکەکێ وەردگرن بەردەوام دکە، ل گۆر ئاگاهیان هندەک ژ ڤان کەچێن بچووک کو تێنە رەڤاندن ژ ئالیێ ئەندامێن ڤێ گرووپا چەتەیان ڤە راستی دەستدرێژییا سێکسی هاتنە.
چاڤکانیێن پێگەها دارکا مازی ئەشکەرە کرن، هەژمارەک ژ کەچێن بچووک یێن کو ژ ئالیێ رێخستنا “جوانێن شۆرەشگەر” ڤە هاتنە رەڤاندن، ژ ئالیێ هنەک ئەندامێن ڤێ رێخستنێ ڤە راستی دەستدرێژییا سێکسی هاتنە لەوما بەرپرسێن ڤێ رێخستنێ جڤینەک د ڤێ دەربارێ دە لدار خستیە و هندەک بریار دەرکرنە.
چاڤکانیێن مە تەکز کرن، د ڤێ جڤینێ دە کو د دەستپێکا مەها تەباخێ یا ئیسال ل سینۆرێ باژارۆکێ کۆبانیێ هاتیە لدارخستن دە بریار هاتیە دایین کو ئەو کەچێن بچووک پێش کو بەشداری دەورەیێن پەروەردەهیا لەشکەری و سیاسی ببن د ناڤا رێزێن هەسەدێ و یەپەگێ دە، پێویست دکە پشکنینا پزیشکی ژ بۆی وان بێ کرن کا ئەو دوگیان بوونە یان نا.
چاڤکانیێن مە ددن ئەشکەرە کرن، ئەڤ بریارا بەرپرسێن “جوانێن شۆرەشگەر” ژ بۆی وێ یەکێ یە کو گەر کەچەک ژ ئەنجاما دەستدرێژییا سێکسی یا ئەندامێن رێخستنێ دوگیان بووبە ژ ڤان دەورەیێن پەروەردەهیێ بێ دورخستن هەتا کو دەستدرێژییا ل سەر وان ئەشکەرە نەبە.
