رەوانگەها سووریەیی ئامارەکە نوو یا قوربانیێن سوەیدایێ بەلاڤ کر

رەوانگەها سووریەیی یا مافێن مرۆڤان به‌لگه‌یێن نوو ل سەر هەژمارا کوشتیێن پارێزگەها سوەیدایێ ئەشکەرە کرن. ئەڤ یەک ژی دسەلمینە کو، زێدەتری هەزار و 650 کەسان هاتنە کوشتن.

رێڤەبەرێ رەوانگەها سووریەیی مافێن مرۆڤان رامی عەبدولرەحمان دوهـ رۆژا (چارشەمیێ، 13ێ تەباخا 2025ێ) ژ کوردستان24ێ رە راگهاند، «هەژمارا کوشتیێن توندوتیژیێن پارێزگەها سوەیدایێ یا باشوورێ سووریەیێ ژ 13 هەتا 20ێ تیرمەهێ هەزار و 653 کەس بوو».

ئەشکەرە ژی کر، «429 کەس ژ وان ژ هێلا هێزێن گرێدایی وەزارەتا بەرگریێ و وەزارەتا ناڤخوەیی یێن سووریەیێ ڤە ب ئەشکەرەیی هاتنە دارڤه‌كرن، ژ وێ هەژمارێ ژی 38 ژن و 14 زارۆک و پیر و کال هەنە».

رێڤەبەرێ رەوانگەها سووریەیی یا مافێن مرۆڤان ئاماژە ژی دا، «هەژمارا کوشتیان ژ بەر پەڤچوون، دارڤه‌كرن و بۆمبەبارانێن ئیسرائیلێ ژ سبەها یەکشەمێ (13ێ تیرمەها 2025ێ) ڤە گهیشتیە هەزار و 653 کەسان کو ب ڤی رەنگێ خوارێ هاتنە پارڤەکرن:

724 کەس ژ وان شێنیێن سوەیدایێ بوون، کو 166 ژ وان سڤیل، 21 زارۆک و 56 ژی ژن بوون.

477 کەس ژ وەزارەتا بەرگریێ و ئەولەکاریا گشتی بوون، 40 ژ وان ئەندامێن عەشیران بوون و یەک ژی چەکدارەکی لبنانی بوو.

 15 کارمەندێن وەزارەتا بەرگریێ و وەزارەتا ناڤخوە د ئێریشێن ئاسمانی یێن ئیسرائیلێ دە هاتن کوشتن.

سێ کەس، کو ژنەک و دو کەسێن نەناسن، د ئێریشا ئاسمانی یا ئیسرائیلێ یا ل سەر ئاڤاهیێ وەزارەتا بەرگریێ دە هاتن کوشتن.

دو مەدیاکار د پەڤچوونێن ل سوەیدایێ دە هاتن کوشتن.