د 18ەمین سالڤەگەرا کۆمکوژیا گروزەر و سیبا شێخ خدر دە، کەسوکارێن قوربانیان داخواز ژ حکوومەتا ئیراقێ دکن کو وان قەرەبوو بکە و تاوانبارێن ئێرشان ئەشکەرە و دەستگیر بکە. قوربانیێن کو ژ کۆمکوژیێ رزگار بوونە دبێژن، برینێن وان هین کوورن و هەتا نها ژی گەلەک شەهید بێسەروشوونن.
ئیرۆ 18 سال د سەر تەقینێن کۆمەلگەهێن گرعزێر و سیبا شێخ خدر یێن سەر ب شنگالێ رە دەرباس دبن، کو د ئەنجامێ دە زێدەتری 300 وەلاتیێن کوردێن ئێزدی ژیانا خوە ژ دەست دان و ب سەدان کەس ژی بریندار بوون. تەڤی دەرباسبوونا ڤان سالان، کەسوکارێن قوربانیان دبێژن کونە حکوومەتا ئیراقێ ئو نە ژی جڤاکا ناڤدەولەتی وەکە پێویست ل وان خوەدی دەرنەکەتیە.
رۆژا 14ێ تەباخا 2007ان، رێزە تەقینێن خوەکوژییێن ب ئۆتۆمۆبیلێن بۆمبەبارکری ل کۆمەلگەهێن گرعزێر و سیبا شێخ خدر یێن شنگالێ پێک هاتن.
ئەڤ ئێرشێن کو راستەراست وەلاتیێن ئێزدی کرن ئارمانج، وەکە یەک ژ خویناویترین کریارێن تەرۆریستی یێن پشتی رووخاندنا رەژیما بەعس ل ئیراقێ تێنە دیتن.
ئێرش ب رێیا چەند کامیۆنێن تژی مادەیێن تەقەمەنیێ و TNT کو ژ ئالیێ خوەکوژان ڤە دهاتن ئاژۆتن، د ساعەت 08:00ێ سبەهێ دە پێک هاتن.
ئامارێن قوربانیان:
– کوشتی: زێدەتری 314 وەلاتی.
– بریندار: ب سەدان کەس.
– وێرانی: نێزیکی 700 مال ب تەمامی هاتن رووخاندن و 1200 مالێن دن زیان دیتن.
– وندایی: ژ بەر دژواریا تەقینان ناسنامەیا 41 قوربانیان نەهات زانین و د گۆرەکە بکۆم دە هاتن ڤەشارتن.
– زارۆکێن سێوی: نێزیکی 400 زارۆک بێ دێ و باڤ مان.
هەر چەند ت ئالیەکی راستەراست بەرپرسیاریا ئێرشان نەگرت سەر خوە، لێ ل گۆری رایەدارێن ئەولەهیێ، تلیا تۆمەتێ بەر ب رێخستنا قاعیدە یا ل ئیراقێ ڤە دهات درێژکرن. د 3ێ ئیلۆنا 2007ان دە، ئارتێشا ئامەریکایێ راگهاند، وان کەسێ ب ناڤێ “ئەبوو محەمەد ئەل-عەفری”، کو وەکە پلانسازێ سەرەکەیێ تەقینان دهات گومان کرن، کوشتیە.
تەڤی ڤان هەموو کارەساتان ژی، هەتا نها حکوومەتا ئیراقێ د قەرەبووکرنا مالباتێن قوربانیان و دەرمانکرنا برینداران دە کێماسیەکە مەزن نیشان دایە.
