هەڤسەرۆکێ گشتییێ دەم پارتیێ دەربارێ ئالۆزیێن ل سووریەیێ و داخویانیێن وەزیرێ دەرڤەیێ ترکیەیێ هاکان فیدان یێن ل سەر هه‌سه‌دێ و یه‌په‌گێ دە گۆت، هەلوەستا ترکیەیێ یا گەفخوارنێ ژ بۆ چارەسەریێ نە ئالیکارە و رەخنە ل سیاسەتا دوئالی یا ئەنقەرەیێ یا ل هەمبەر کوردان گرت.
هەڤسەرۆکێ گشتییێ پارتیا وەکهەڤی و دەمۆکراسیێ یا گەلان (دەم پارتی) تونجەر باکرهان ئیرۆ 14ێ تەباخێ ژ مەدیایا ترکیەیێ رە دیار کر، حکوومەتا نوو یا ل سووریەیێ وەکە بەردەوامیا هەمان زیهنیەتا دەستهلاتا ئەسەدە و گۆت: «د هەر فەرسەندێ دە بکارانینا زمانێ گەفخوارنێ ل دژی سەرکردایەتی و گەلێ باکور و رۆژهلاتێ سووریەیێ، ت فەیدەیێ نادە تو کەسی».
“پرسا کوردێن سووریەیێ ل شامێ و یا ترکیەیێ ل ئەنقەرەیێ تێ چارەسەرکرن”
هەڤسەرۆکێ دەم پارتیێ بال کشاند سەر جوداهیا د ناڤبەرا سیاسەتا ترکیەیێ یا ل هەمبەر کوردێن ترکیەیێ و کوردێن سووریەیێ دە و وها ئاخڤی:
“نابە کو دەستهلاتا ترکیەیێ پشتی دەستپێکرنا پێڤاژۆیا ئاشتیێ، ب ئاوایەکی جودا سەرەدەریێ ل گەل کوردێن ترکیەیێ و ب ئاوایەکی دن ل گەل کوردێن سووریەیێ بکە. کوردێ سووریەیێ ل شامێ ل چارەسەریێ دگەرە و کوردێ ترکیەیێ ژی ل ئەنقەرەیێ ل چارەسەریێ دگەرە. گرێدانا هەر دو ئالیان ب هەڤ رە نە کارەکی راستە”.
باکرهان بانگ ل وەزیرێ دەرڤە هاکان فدان کر کو زمانەکی گونجاو ژ بۆ پێڤاژۆیێ بکار بینە و پرسی: «گەلێ کورد ل رۆژئاڤا چاوا دکارە ب وان کەسان باوەر بکە کو خوە وەکە کۆمارا عەرەبی یا سووریەیێ ب ناڤ دکن؟»
