ب بۆنەیا 79ەمین سالڤەگەرا دامەزراندنا پارتیا دەمۆکراتا کوردستانێ (پەدەکێ)، سەرۆک مەسعوود بارزانی پەیامەکا پیرۆزباھیێ بەلاڤ کر. د پەیاما خوە دە، سەرۆک بارزانی تەکەزی ل سەر رۆلا دیرۆکی یا پەدەکێ کر و بانگ ل ئەندام و ئالیگرێن پارتیێ کر کو د خزمەتا کوردستانێ دە خوەدی ئیرادەیەکا بھێز بن.
د دەستپێکا پەیاما خوە دە، سەرۆک بارزانی پیرۆزباھیێن ھەری گەرم پێشکێشی ھەموو کادرۆ، ئەندام، جەماوەر و ئالیگرێن پەدەکێ، مالباتێن سەربلندێن شەھیدان، پێشمەرگەیێن قەھرەمان و ھەموو چین و پێکھاتەیێن کوردستانێ کر.
د پەیامێ دە ھات دەستنیشانکرن، دامەزراندنا پەدەکێ د 16ێ تەباخا 1946ێ دە پێویستیەکا دیرۆکی بوو ژ بۆ بەردەوامی و درێژیپێدانا ب خەباتا گەلێ کوردستانێ ل ھەمبەری پلانێن نەیار و داگیرکەران.
سەرۆک بارزانی گۆت: “پارتی ژ دەستپێکا دامەزراندنا خوە ڤە ھەتا نھا، ئامرازەک بوویە ژ بۆ پاراستنا ماف، ناسنامە و ھەبوونا گەلێ کوردستانێ و د ھەمان دەمێ دە ئامرازەک بوویە ژ بۆ پێکانینا ئارمانجێن دەمۆکراتیک، نشتمانی و نەتەوەیی یێن گەلێ کوردستانێ.”
ھەروھا سەرۆک بارزانی تەکەزی ل سەر وێ یەکێ کر، پەدەکە د ھەموو قۆناغان دە ھلگرێ پەیاما ئاشتیێ و کوورکرنا پڕەنگی، براتی و پێکڤەژیانێ بوویە و د ڤێ چارچۆڤەیێ دە رۆلا خوەیا پێشەنگ د قۆناخێن گرینگ و دیارکەرێن دیرۆکا سیاسییا کوردستان و ئیراقێ دە ب باشی لیستیە.
د داویا پەیاما خوە دە، سەرۆک بارزانی ب تایبەتی بانگ ل ئەندام و ئالیگرێن پەدەکێ کر و گۆت: “پەیاما من ژ بۆ وە ئەوە کو پەدەکە پارتیا دۆز و نرخێن بلندێن گەلێ کوردستانێیە، پەدەکە پارتیا رێبازا بارزانی و جھێ ھێڤیا خەلکێ کوردستانێیە. ژ بەر ڤێ یەکێ، دڤێت ھەموو پارتیی د ئاستا مەزناھیا دیرۆکا پارتیا خوە و خوینا شەھیدان دە بن و ئەرکا خوە کو خزمەتکرن، ئاڤادانی و سەقامگیریا کوردستانێیە، ب ئاوایەکی ھەری باش بجھ بینن.”
سەرۆک بارزانی د داویا پەیاما خوە دە گۆت: “ئەز داخوازێ ژ ھەموو پارتیان دکم کو ئیرادە و ھێڤیا وان بھێز بە، ژ بەر کو ھەکە پەدەکە بھێز بە، کوردستان بھێزە.”
