ل ناڤچەیێن کاراز، لجێ و ھێنێ یێن دیاربەکرێ شەواتەکا مەزن دەرکەت. ژ بەر کو دەستێوەردان ژ ئاسمان ڤە نەھات کرن، ئاگر ب لەز بەلاڤ بوو و د ئەنجامێ دە ب ھەزاران دۆنم دارستان شەوتین و سێ وەلاتی ژی بۆ نەخوەشخانەیێ ھاتن راکرن.
ئاگر دوھ 15ێ تەباخێ پشتی نیڤرۆ ل گوندەوارێ ناڤچەیا کارازێ ژ بەر سەدەمەکا نەدیار دەرکەت. ژ بەر بایێ، شەواتێ د دەمەکێ کورت دە گەش بوو و خوە گھاند سینۆرێن ناڤچەیێن لجێ و ھێنێ.
ھەڤشارەدارێن باژارێ مەزنێ دیاربەکرێ سەڕا بوجاک و دۆگان ھاتون چوون ھەرێما شەواتێ. تیمێن شارەداریێ و وەلاتیێن ھەرێمێ ب ھەموو دەرفەتێن خوە ھەول دان کو ئاگر ڤەمرینن. لێ بەلێ، ژ بەر کو ژ ئاسمان ڤە ب ھەلیکۆپتەران دەستێوەردان نەھات کرن، ھەولدانێن بەژاھی تێرێ نەکرن و ئاگر خوە گھاند ناڤا گوندان.
ل گۆری زانیاریێن ھەری داوی، شەواتا ل ناڤچەیا لجێ ھین ژی ب ئاوایەکی بەرفرەھ ددۆمە. پارێزگاریا دیاربەکرێ ژی دەربارێ مژارێ دە داخویانیەک دا و راگھاند، سێ کەسێن کو ژ دوومانێ ب باندۆر بوونە، بۆ نەخوەشخانەیێ ھاتنە ڤەگوھەستن. د داخویانیێ دە ھات پشتراستکرن کو ب ھەزاران دۆنم ئەردێ دارستانی ب تەمامی شەوتیە.
